Kuri uyu wa gatandatu muri Hilltop Hotel i Remera habereye amatora y’inzego ziyobora Ishyirahamwe ry’umukino w’amagare mu Rwanda, FERWACY mu gihe cya manda y’imyaka ine iri imbere nk’uko amategeko y’irishyirahamwe abiteganya.
Muri aya matora byari biteganyijwe ko hatorwa Komite Nyobozi ndetse na komite ngenzuzi kimwe kandi na komite nkemurampaka, muri ayo matora ubwo yabaga hagaragaye ko uwari usanzwe ayobora iri shyirahamwe Murenzi Abdallah ariwe ugiye gukomeza kuyobora.
Murenzi Abdallah wahataniraga kuyobora iri shyirahamwe nk’umukandida rukumbi bivuze ko ntawe bari bahanganye yatowe ku majwi 10 kuri 11 kuko muri aya matora hagaragayemo imfabusa imwe.
Mu yindi myanya y’abatowe, Karangwa François yatowe nka Visi Perezida wa mbere, akaba yatowe ku majwi 11/11, Kayirebwa Liliane yatorewe kuba Visi Perezida wa Kabiri n’amajwi 11/11, Munyankindi Benoït yatorewe kuba umunyamabanga mukuru naho Ingabire Assia yongeye gutorerwa kuba umubitsi wa FERWACY.
Aba bose batowe muri iri shyirahamwe ry’umukino wo gusiganwa ku magare mu Rwanda, FERWACY, bafite manda yo kuyobora kugeza muri 2026, ibi bivuze ko bafite imyaka ine bayobora iri shyirahamwe.
Ku mugoroba wo kuri uyu wa gatanu, tariki ya 10 Kamena 2022 nibwo ubuyobozi bw’ikipe ya Kiyovu Sport Club yatangaje ko yagiranyea masezerano n’abakinnyi babiri bakomoka mu gihugu cya Sudan aribo Sheiboub Sharaff na Mano John.
Nk’uko amakuru RUSHYASHYA yamenye ni uko aba bakinnyi bombi bakina mu gice gisatira izamu bahawe amasezerano y’imyaka ibiri bose bakinira ikipe y’Urucaca.
Sheiboub usanzwe akina ku ruhande rw’iburyo asatira, yanyuze mu makipe atandukanye azwi kuri uyu mugabane wa Afurika harimo SImba SC yo muri Tanzania, Almeriekh SC na Al Hilal zo muri Sudan, JSK na ASC zo muri Tunisia ndetse na CS Constatine yo muri Algeria.
Uyu kandi yanakiniye amakipe y’abato ba Sudan, harimo abari munsi y’imyaka 17, 20 ndetse na 23.
Usibye aba bakinnyi ikipe ya Kiyovu yamaze gutangaza, hari abandi bakinnyi basanzwe bakinira iyi kipe ngo bamaze kumvikana n’abandi bakinnyi batatu b’Abanyarwanda.
Gusa ibi Kiyovu irimo kubikora mu gihe bagitegereje ko umwaka w’imikino wa 2021-2022 utari warangira dore ko hasigaye imikino 2 ngo urangire ndetse iyi kipe ikaba igifite amahirwe yo kuba batwara igikombe cya Shampiyona igihanganiye na APR FC iyirusha amanota 2.
Binyuze ku rubuga rwa Twitter rw’ikipe ya Gasogi United, yaraye isezeye uwahoze ari rutahizamu wayo Iddy Museremu utarahiriwe n’iyi kipe, uyu rutahizamu ukomoka mu gihugu cy’u Burundi akigera mu Rwanda yari yahawe izina ry’Intare y’Akanwa Rwabwiga.
Kuri uyu wa gatandatu byari biteganyijwe ko imikino ibanza ya 1/2 cy’imikino yo mu kiciro cya kabiri, gusa ishyirahamwe ry’umupira w’amaguru mu Rwanda ,FERWAFA, yaraye itangaje ko iyi mikino itari bukinwe mu mpera z’iki cy’umweru ahubwo ikaba izakinwa ku itariki ya 14 Kamena 2022.
