Kuri uyu wa gatanu tariki ya 23 Nyakanga 2022 nibwo ikipe ya Rayon Sports yatangiye imyitozo yitegura umwaka utaha w’imikino wa 2022-2023, ni imyitozo yatangijwe n’umutoza mukuru wayo mushya Haringingo Christian Francis ibera mu Nzove.
Ni imyitozo itari ikomeye cyane kuko abakinnyi bafashe umwanya utari munini wo gukora ku mupira, ibindi bibanzeho kwari ukureba uko bahagaze mu buryo bw’imbaraga dore ko hari hashize iminsi shamipiyona y’umwaka irangiye bamwe bakaba ntaho bahuriraga n’imyitozo.
Bamwe mu bakinnyi bashya baguzwe muri iyi kipe bitabiriye iyi myitozo harimo Ndekwe Felix wavuye mu ikipe ya AS Kigali, Ganijuru Elia na Jackson bavuye muri Bugesera FC ndetse n’abandi gusa kuri myugariro Ngendahimana Eric we ntiyakoranye n’abandi kuko yasabye uruhushya rwo kujya gukemura ibibazo byo mu muryango.
Biteganyijwe ko kuri uyu wa gatandatu, hari abandi bakinnyi bari bwiyongere muri iyi kipe harimo Osalue Rapfael wavuye muri Bugesera FC naho abarimo Onana Leandre Willy Essombe, Musa Esenu na Samuel Ndizeye bakazatangira mu cyumweru gitaha.
