Imiryango myinshi yo mu Burundi iri mu gahinda nyuma y’impanuka ikomeye yabereye i Kabanga, muri Komini Busoni, Intara ya Butanyerera, ku mugoroba wo ku wa 15 Ugushyingo 2026. Amakuru yatangajwe n’ibitangazamakuru bitandukanye agaragaza ko nibura abantu 31 bahasize ubuzima, abandi bagakomereka, ubwo ikamyo yari itwaye urubyiruko rw’ishyaka CNDD-FDD, ruzwi nk’Imbonerakure, yakoraga impanuka.
Nk’uko Radio Publique Africaine (RPA) yabitangaje, abari muri iyo kamyo bari bavuye mu bikorwa by’ishyaka CNDD-FDD byabereye i Mukinya, muri Komini Ngozi. Iyi mpanuka yongeye kugaragaza ikibazo cyo gutwara abantu benshi mu makamyo asanzwe agenewe imizigo, uburyo bushobora gushyira ubuzima bw’abagenzi mu kaga ariko ntacyo bibwiye Perezida Ndayishimiye ushishikajwe no kwiyamamaza kurusha ubuzima bw’abaturage.
Mu gihe u Burundi bumaze igihe buhanganye n’ikibazo cy’ibura ry’ibikomoka kuri peteroli, iyi mpanuka itumye hibazwa niba uburyo bwo gutwara abaturage mu bikorwa bya politiki buhabwa ingamba zihagije z’umutekano.
Perezida Évariste Ndayishimiye, uzwi ku izina rya Neva, yatangaje ubutumwa kuri X agaragaza akababaro yatewe n’iyi mpanuka, yihanganisha imiryango y’ababuze ababo. Mu butumwa bwe bwatangajwe n’ibitangazamakuru, yavuze abantu 31 bapfuye ariko ntiyagaragaje ko bari abarwanashyaka ba CNDD-FDD.
Ibi bituma havuka ibibazo bikwiye gusubizwa mu mucyo: Ni nde wateguye urugendo? Ni nde wemeye ko abantu benshi batwarwa mu ikamyo itagenewe gutwara abagenzi? Ese hakurikijwe amategeko y’umutekano wo mu muhanda? Kandi ni izihe ngamba ziteganyijwe zo kurengera imiryango y’abahitanywe n’impanuka?
Ikindi, mu gihe u Burundi bwitegura amatora ya Perezida ateganyijwe ku wa 3 Gicurasi 2027, iyi mpanuka irerekana akamaro ko gushyira umutekano n’ubuzima bw’abaturage imbere y’ibikorwa byose bya politiki.




