Ba rutahizamu babiri b’ikipe ya APR FC, Byiringiro Lague na Ishimwe Anicet bongereye amasezerano y’imyaka ine bakinira ikipe y’ingabo z’igihugu ya APR FC nk’uko byemejwe n’iyi kipe ifite ibikombe byinshi bya shampiyona y’u Rwanda.
Binyuze ku rubuga rwa internet rwa APR FC, batangaje ko igikorwa cyo gusinyisha aba bakinnyi cyabaye ku munsi wo kuwa gatandatu tariki ya 5 Gashyantare 2022, aha kandi bongeyeho ko aba bombi basinye amasezerano y’imyaka ine.
APR FC yagize iti “Ubuyobozi bw’ikipe y’ingabo z’igihugu APR F.C bwongereye amasezerano abakinnyi bayo babiri Byiringiro Lague ndetse na Ishimwe Anicet igihe cy’imyaka ine buri wese.”
Rutahizamu Ishimwe Anicet uri kuzuza imyaka 18 y’amavuko yongereye amasezerano y’imyaka ine nyuma yo kumara hafi indi myaka itatu akinira iyi kipe y’ingabo z’igihugu, uyu musore kandi akaba yarakuriye no mu ikipe y’abato ya APR FC izwi nk’Intare FC.
Kuri Byiringiro Lague nawe amaze igihe muri iyi kipe y’ingabo yongerewe amasezerano y’imyaka ine akiri muri iyi kipe yagezemo avuye mu ikipe y’Intare FC, uyu mukinnyi akaba yarigaragaje mu mikino yakinnye cyane cyane mu mwaka w’imikino wa 2019-2020.
APR FC yongereye amasezerano aba bakinnyi yitegura gukomeza gukina umukino wa mbere w’imikino yo kwishyura muri shampiyona y’u Rwanda 2021-2022, iyi kipe ikaba izasura ikipe ya Gicumbi FC kuri iki cyumweru tariki ya 13 Gashyantare 2022.
