Impera z’icyumweru dushoje zisize mu mukino w’intoki wa Volleyball hakinwa igice cya mbere cy’irushanwa ryateguwe na Forzza ndetse iranaryitirirwa, forzza Volleyball tournament 2021 ryari ryabereye mu mujyi wa Kigali, mu bagabo Gisagara VC yegukanye umwanya wa mbere naho Union Volleyball Club iyobora mu bagore.
Ni irushanwa ryahuje amakipe atandukanye yo mu kiciro cya mbere mu bagabo ndetse n’abagore ryatangiye ku wa gatandatu tariki ya 11 Ukuboza 2021 ribera mu nyubako ya Petit Stade ndetse n’inzu ikinirwamo n’abafite ubumuga ya NPC.
Uhereye ku wa gatandatu amakipe yahuye hagati yayo mu byiciro byombi kugeza ubwo habonetse amakipe 4 ajya muri 1/2, abona guhatanira umwanya wa mbere waraye ukinwe mu masaha y’umugoroba wo kuri iki cyumweru tariki ya 12 Ukuboza 2021.
Ku mukino wa nyuma mu kiciro cy’abagabo, ikipe ya Gisagara VC yatsinze ikipe ya REG VC amaseti 3-1 (25-20, 25-20, 23-25, 25-17).
Mu kiciro cy’abagore, ikipe ya Union Volleyball Club (UVS) yegukanye umwanya wa mbere itsinze ikipe ya APR VC amaseti 3-2 (25-18, 11-25, 22-25, 25-18, 15-09).
Iri rushanwa rya Forzza Volleyball tournament 2021 rikinwe nyuma yaho kugeza ubu ishyirahamwe ry’uyu mukino w’intoki mu Rwanda (FRVB) ryahagaritswe, ibi bikaba bivuze ko nta marushanwa ayariyo yose FRVB ishobora gutegura ngo akinwe ndetse kandi ntabwo yanatanga amakipe mu marushanwa mpuzamahanga.
Forzza Volleyball Tournament 2021 igiye gukinwa mu byiciro bine bizarangirana n’uku kwezi k’ Ukuboza 2021, biteganyijwe ko mu mpera z’iki cyumweru dutangiye igice cya kabiri kizakinirwa mu karere ka Gisagara ndetse na Huye, naho ibindi bibiri bisigaye bikaba bizakinirwa mu mujyi wa Kigali.
Ikipe izegukana iri rushanwa izamenyekana nyuma y’ibyo byiciro byose hamaze guteranywa amanota y’uko yitwaye mu byiciro 4 bizaba byakinwe haba mu bagabo ndetse n’abagore.
