Ikipe y’umukino w’intoki wa Volley Ball ya Rwanda Energy Group (REG) yamaze gusinyisha abakinnyi babiri bakiniraga ikipe ya Union Volleyball Club (UVC) aribo Mahoro Yvan ndetse na Murangwa Nelson, aba bombi bakaba bahawe amasezerano y’imyaka ibiri bakinira iyo kipe.
Binyuze ku rubuga rwa twitter rw’iyi kipe ya REG VC, bahereye kuri Mahoro Yvan bemeza ko yasinyiye iyi kipe amasezerano y’imyaka ibiri.
Bagize bati “Umukinnyi Mahoro Ivan wakiniraga UVC yasinyiye #REGVC amasezerano y’imyaka 2.”
Kuri Murangwa Nelson naho ubuyobozi bwa REG bwemeje ko nawe yamaze kuba umukinnyi wayo, bati “Umukinnyi Murangwa Nelson wakiniraga UVC yasinyiye REG VC amasezerano y’imyaka 2 adukinira.”
Aba bakinnyi bombi bageze muri REG bavuye muri United Volleyball Club yabayeho nyuma yaho iyi kipe yahoze ari iya Kaminuza ya UTB kugeza ubu itakiri mu makipe azakina shampiyona y’u Rwanda haba mu bagabo ndetse n’abagore.
Murangwa Nelson yasinye amasezerano y’imyaka ibiri muri REG VC nyuma yaho yagiye akinira amakipe atandukanye arimo Rayon Sports VC, Gisagara na UTB VC, yanakiniye kandi amakipe atandukanye yo ku mugabane w’Uburayi ndetse n’Aziya.
Kuri Mahoro Yvan we ageze mur REG VC yaranyuze mu makipe atandukanye na arimo ikipe ya GSOB Indatwa y’i Butare, Rayon Sports VC ndetse na UTB VC utakiri umunyamuryango, uyu we kandi akaba yarakinnye no hanze y’u Rwanda.
