Ubwo hatangiraga imikino ibanza ya 1/8 cy’irangiza y’irushanwa rihuza amakipe yitwaye neza ku mugabane w’i Burayi, ikipe ya Paris St Germain yo mu Bufaransa yaraye itsinze ikipe ya Real Madrid yo muri Esipanye igitego kimwe ku busa.
Ni umukino waraye ubaye mu ijoro ryo kuri uyu wa kabiri, tariki ya 15 Gashyantare 2021 ubere mu mujyi wa Paris kuri Parc de Prince, ni umukino warangiye rutahizamu Kylian Mbappe ayiboneye igitego kimwe rukumbi cyabonetse ku munota wa 90.
Mbere y’uko iki gitego kiboneka, iyi kipe yari mu rugo ya PSG yabonye penaliti nyuma y’ikosa ryari rikorewe kuri Mbappe maze Lionel Messi ayiteye ikurwamo n’umunyezamu Thibot Courtois, hari ku munota wa 62.
Ni umukino utagaragayemo mugariro Sergio Ramos wavuye muri Real Madrid yerekeza muri PSG kubera ko yagize ikibazo cy’imvune cyatumye ataboneka, ku rundi ruhande Neymar we yagaragaye muri uyu mukino nyuma y’igihe kitari gito yaragize imvune
Mu wundi mukino wa 1/8 cy’irangiza wa UEFA Champions League, ikipe ya Sporting Club Portugal yatsinzwe na Manchester City ibitego bitanu ku busa.
Ni ibitego byatsinzwe na Riyad Mahrez, Phil Foden, Bernardo Silva watsinzemo ibitego bibiri wenyine ndetse na Raheem Sterling.
Kuri uyu wa gatatu tariki ya 16 Gashyantare 2022, imikino irakomeza hakinwa imikino ibanza ya 1/8 cya UEFA Champions League aho ikipe ya Inter de Milan yakira Liverpool naho FC Salzburg yakire Bayern Munich ku isaha ya saa yine z’ijoro.
