Ingimbi z’u Rwanda ‘Amavubi U-17’ zatangiye nabi mu irushanwa ryateguwe n’ishyirahamwe ry’Umupira w’Amaguru mu Rwanda, FERWAFA, zinyagirwa n’iza Cameroun ibitego 3-1 mu mukino wa mbere wabereye kuri Stade ya Kigali i Nyamirambo kuri uyu wa Gatanu.
Iri rushanwa ryateguwe na FERWAFA mu rwego rwo gufasha ikipe y’abakiri bato kubona imikino ya gicuti mu gihe Tanzania na Cameroun zitabiriye mu rwego rwo kwitegura igikombe cya Afurika cy’abatarengeje imyaka 17 kizabera muri Tanzania mu kwezi gutaha.
Mu mukino wabaye uyu munsi, Amavubi U-17 yabanje gufungura amazamu ku gitego cyatsinzwe na Nyarugabo Moïse, ku munota wa 26 w’umukino ku mupira wari uvuye muri koruneri, atsindisha umutwe.
Nyuma y’iminota 10, Cameroun yishyuye iki gitego, itsindiwe na Bere François ku munota wa 36 mu gihe Leonel Wamba yatsinze igitego cya kabiri ku ruhande rw’abashyitsi hashize iminota ibiri gusa.
Ubwo bari bavuye kuruhuka ari ibitego 2-1, hari icyizere ko Amavubi y’abakiri bato, yaherukaga gukina mu mwaka ushize, yabona igitego cyo kwishyura ariko icyizere cyaje kuyoyoka ku munota wa 65 w’umukino ubwo Mvoue Steve yatsindiraga Cameroun igitego cya gatatu kuri penaliti nyuma y’ikosa umunyezamu w’Amavubi U-17 Hakizimana Adolphe yakoreye kuri Wamba mu rubuga rw’amahina.
Iri rushanwa rizakomeza kuwa Mbere tariki ya 1 Mata 2019, Cameroun ihura na Tanzania mu gihe umukino wa nyuma uzaba ku wa Kane, Tanzania ihura n’u Rwanda.
Tanzania na Cameroun bari kwitegura CAN U-17 izabera muri Tanzania guhera tariki ya 18 kugeza ku ya 24 Mata 2018.
