Perezida wa Uganda Yoweri Kaguta Museveni yahinduye ubuyobozi bukuru bw’Ingabo za Uganda, UPDF, akuraho uwari Umugaba Mukuru w’Ingabo Katumba Wamala amusimbuza Maj Gen David Muhoozi.
Muri aya mavugurura yatangajwe kuwa Mbere, Gen Wamala yahise agirwa Umunyamabanga wa Leta muri Minisiteri ishinzwe ibikorwa remezo n’ubwikorezi, gusa ategereje kwemerwa n’Inteko Ishinga Amategeko ya Uganda.
Daily Monitor yatangaje ko Umuvugizi w’Ingabo za Uganda, Lt. Col. Paddy Ankunda yemeje aya makuru, avuga ko kuri uyu wa Kabiri aribwo hatangazwa byinshi kuri izi mpinduka.
Maj Gen David Muhoozi wagizwe Umugaba Mukuru w’Ingabo yari asanzwe ari Umugaba w’Ingabo zirwanira ku butaka.
Muri aya mavugurura kandi Perezida Museveni yakuye umuhungu we Maj Gen Muhoozi Kainerugaba ku buyobozi bw’umutwe udasanzwe w’Ingabo, Special Forces Commander (SFC) amugira Umujyanama we wihariye ushinzwe ibikorwa.
Ubusanzwe SFC niwe uba ushinzwe ibirebana n’umutekano bwite wa Perezida wa Uganda no kurinda ibindi bikorwa bikomeye by’igihugu.
Mu bandi bazamuwe mu ntera bakanahabwa imirimo mishya, harimo Brigadier Peter Elwelu wayoboraga 2nd Division Brigade yakoreraga Mbarara, wazamuwe mu ntera agahabwa ipeti rya General Major, ahita agirwa Umugaba w’Ingabo zirwanira ku butaka.
Uyu musirikare niwe uheruka kuyobora igitero cyagabwe ku bwami bwa Rwenzururu kigasiga abantu basaga 100 bahasize ubuzima, Umwami Mumbere akaba akiri imbere y’urukiko.
Perezida Museveni n’ Abayobozi b’Ingabo
