Abanyarwanda babiri ndetse n’umwe mu bayoboke b’ihuriro Amizero y’Abarundi kuri uyu wa Kane batawe muri yombi n’urwego rushinzwe ubutasi mu Burundi (SNR).
Abatawe muri yombi ni; Fabien Ngerageze, wo mu ihuriro ry’abatavuga rumwe n’ubutegetsi, Amizero y’Abarundi, ndetse n’Abanyarwanda babiri, Callixte Mpozenzi na Juvenal Mundane. Bafatiwe muri Komini Bukinanyana, mu Ntara ya Cibitoke, kuri uyu wa Kane, itariki 25 Ukwakira nyuma ya saa sita.
Amakuru aturuka ahabereye ibi agera kuri SosMediasBurundi dukesha iyi nkuru, avuga ko aba batawe muri yombi n’ubuyobozi b’urwego rw’igihugu rw’ubutasi (SNR) mu ntara. Barashinjwa gufatanya n’imitwe yitwaje ibirwanisho ngo iba mu Rwanda.
Aya makuru akomeza avuga ko aba batwawe baziritswe imodoka yabatwaye ikarengera I Kayanza, mu ntara ituranye na Cibitoke. Umwe mu baturage akaba yagize ati: “Dufite ubwoba bw’ubuzima bwabo.”
Abaturage kandi bavuga ko abo Banyarwanda babiri bamaze imyaka isaga 30 batuye aha muri Bukinanyana kandi nta kibazo bari bafitanye n’abaturanyi babo.
Abo mu miryango yabo bakaba basaba ko barekurwa kuko ibyo bashinjwa nta shingiro bifite nk’uko iyi nkuru ikomeza ivuga.
Ubuyobozi bwa SNR mu Cibitoke nabwo bwemeje aya makuru y’itabwa muri yombi ry’aba bantu, ariko busaba gutegereza ibizava mu iperereza.
