Ibitego bibiri bya Elia Lina Meschack n’ikindi cya Jonathan Bolingi, bifashije ikipe ya Congo Kinshasa gukora amateka yegukana CHAN ku nshuro ya kabiri, itsinze Mali ku mukino wa nyuma wa CHAN ya 2016, ibitego 3-0, mu mukino waberaga kuri stade Amahoro i Remera kuri iki Cyumweru.
Abafana bari besnhi ba kubise buzuye
Mu mvura nyinshi Congo Kinshasa yatangiye umukino iri ku rwego rwo hejuru ndetse ishyigikiwe n’imbaga nyamwishi y’abakongomani, ikipe ya Congo yokeje igitutu Mali, ibona uburyo bwashoboraga kuvamo igitego ku munota wa gatanu w’umukino ubwo umutwe wa Elia Lina Meschack wacaga hejuru y’izamu rya Djigui Diarra.
Elia Lina Meschack wigaragaje cyane muri uwo mukino
Mali yakangutse, ibifashijwemo n’ikibuga cyanyereraga cyane ku ruhande rwa Congo Kinshasa, ibona uburyo bubiri mu bihe bitandukanye ku musore wayo, Mamadou Coulibary, aho ubwa mbere bwabonetse ku munota wa 8 umupira wanyuze iruhande rw’izamu naho ubwo ku munota wa 10, umupira uca hejuru y’izamu rya Ley Matampi.
Mali nayo yanyuzagamo Igasatira
Zachari Mombo watangiye akina ku ruhande rw’ibumoso yacenze ba myugariro b’inyuma ba Mali ariko baza kumunaniza ntiyabyaza umusaruro umupira wifatiwe n’abakinnyi ba Mali baje no kubona koruneli ya mbere mu mukino ku munota wa 12, ariko ba myugariro ba Congo Kinshasa barahagoboka.
Congo bishimira igitego
Doxa Gikanji ukunze kurangwa n’amashoti akomeye, yagerageje uburyo butandukanye mu izamu rya Mali, ariko ishoti rikomeye yateye ku munota wa 13 rica ku ruhande rw’izamu rya Diarra.
Amakipe yombi yakiniye mu kibuga hagati mu minota itanu yakurikiyeho, mbere yuko umukino uhagarara umunota umwe, havurwa Alou Dieng na Lomalisa Joyce bari bagonganye.
Nyuma yo kubona agorwa na Lassana Samake wakinaga inyuma ku ruhande rw’ibumoso rwa Mali, Elia Lina Meschack yaguranye na Bompo Zacharie, asubira ku ruhande rw’ibumoso, maze abasore bombi bakinisha Mali.
Zacharie Bompo yagerageje amahirwe n’umutwe ku munota wa 26, umupira uca hejuru y’izamu, ariko Elia Meschack atsindira Congo Kinshasa igitego cya mbere ku munota wa 29 ku mupira wari uvuye kuri Jonathan Bolingi maze uyu mukinnyi wamaze kugurwa na TP Mazembe imukuye muri Don Bosco, yitegereza uburyo Djigui Diarra ahagaze, amutera ishoti rikomeye mu mfuruka y’ibumoso bw’izamu. ntiyasobanukirwa ibibaye.
Congo bahawe igikombe
Congo yahushije igitego ku buryo bwa Bolingi nyuma y’iminota itatu itsinze igitego, ariko nako Ley Matampi yayitabaye ubwo yari ugarijwe na Lassana Samake ku munota wa 35 w’umukino.
Djigui Diarra yitwaye neza ku mupira wa Bolingi yashyize muri koruneli, mbere yuko na Kimwaki arenza umupira wavuyemo koruneli ya Mali, ariko Matampi afata neza umupira wa Mamadou Doumbia.
hanaturikijwe byabishashi byo hejuru
Mbere yuko amakipe yombi ajya kuruhuka, Issaka Samake wa Mali, yahawe ikarita ya mbere y’umuhondo muri uyu mukino, nyuma yo kugusha Meschack wari wamusize, coup-franc yahawe ayiteye igarurwa n’urukuta, asongejemo umupira urarenga.
Mali yinjiye mu gice cya kabiri ishaka kwishyura, yananiwe kuzibira Elia Mschack wabatsinze igitego cya kabiri ku munota wa 61 w’umukino ku mupira wa Yannick Bangala.
Congo yakomeje kotsa igitutu Mali, nyuma yo guhusha uburyo bwa Mombo kuri koruneli, Lomalisa yacenze ba myugariro ba Mali, ahereza umupira Jonathan Bolingi watsinze igitego cya gatatu cya Congo Kinshasa ku munota wa 72 w’umukino.
Ni ku nshuro ya kabiri Congo Kinshasa yegukana CHAN. Iya mbere niyo mu 2009 batwariye muri Cote d’Ivoire batsinze Ghana 2-0.
Perezida Kagame ahereza igikombe Kapiteni wa leopard Joel Kimwaki
Mu 2011 na 2014, baviriyemo muri ¼, batsinzwe na Tunisia na Ghana igitego 1-0 ku nshuro zombi.
Abakinnyi babanjemo:
Congo Kinshasa: 1 Matampi, 19 Kimwaki, 17 Bokadi, 22 Bangala, 14 Munganga, 3 Mutambala, 2 Bahumeto, 7 Gikanji, 21 Bolingi, 6 Mombo, 5 Meschack.
Umutoza: Florent Ibenge
Mali: 16 Diarra, 4 Issaka Samake, 21 Dante, 18 Dieng, 15 Doumbia, 12 Samake, 13 Sissoko, 19 Diarra, 10 Coulibaly, 9 Sinayoko, 23 Koita.
Ibihembo
Ikipe y’igihugu ya Congo Kinshasa, yahawe amadolari 750 000 ya Amerika nk’ikipe yabaye iya mbere muri ri rushanwa ryaberaga mu Rwanda ku nshuro yaryo ya kane.
Elia Lina Meschack, umukinnyi wo hagati mu ikipe ya Congo Kinshasa, ukina asatira, ni we watowe nk’umukinnyi w’irushanwa nyuma yo gutsinda ibitego bine muri iri rushanwa ndetse akaba yarabaye umukinnyi w’umukino inshuro eshatu, harimo no kuri uyu mukino wa nyuma.
Amakipe 16 yitabiriye CHAN ya 2016, yagabanye yose ahamwe miliyoni 3 n’ibihumbi 200 by’amadolari angana na miliyari ebyiri na miliyoni 379 n’ibihumbi 991 (2,379,991,263.65) uyavunje mu manyarwanda.
Uko ibihembo byasaranganijwe mu mibare
Congo Kinshasa yabaye iya mbere, yahawe igikombe n’amadolari ya Amerika 750,000, angana na 557,810,452 Frw.
Mali yabaye iya kabiri, yahawe amadolari ya Amerika ibihumbi 400,000, angana na 297,498,907 Frw.
Cote d’ivoire yabaye iya gatatu na Guinea yabaye iya kane, zahawe amadolari ya Amerika 250,000, angana na 185,936,817 Frw.
Amakipe ane yasezerewe muri ¼ (Rwanda, Cameroon, Tunizia na Zambia) buri imwe yahawe ibihumbi 175$ mu gihe amakipe yabaye aya gatatu mu itsinda (Maroc, Angola, Nigeria na Uganda) buri imwe yahawe ibihumbi 125$ naho aya nyuma mu itsinda (Gabon, Ethiopia, Niger na Zimbabwe) yahawe ibihumbi 100 by’amadolari y’Amerika.
M.Fils
