Ubuyobozi bw’ishyirahamwe ry’umupira w’amaguru mu Rwanda FERWAFA bwanze icyifuzo cy’ikipe y’ingabo z’igihugu ya APR FC yari yasabye ko yakurirwaho umukino w’umunsi wa kane wa shampiyona uzayihuza na Rayon Sports mu rwego rwo kwitegura gukina umukino n’ikipe ya RS Berkane yo muri Maroc.
Ibyo kwanga ubu busabe bwa APR FC bije nyuma yaho kuwa kabiri w’iki cyumweru ku itariki ya 16 Ugushyingo 2021, iyi kipe yandikiye FERWAFA iyisaba ko uyu mukino uteganyijwe gukinwa ku itariki ya 23 Ugushyingo 2021 wakurwaho kugirango yitegure neza umukino mpuzamahanga wa CAF Confederation Cup uzayihuza na RS Berkane mu ijonjora rya gatatu ry’iri rushanwa.
Mu ibaruwa FERWAFA yandikiye iyi kipe yagize iti “Tubandikiye tubamenyesha ko ubusabe bwanyu butemewe kuko impamvu mugaragaza zidafite ishingiro bitewe n’uko iminsi yo kwitegura umukino wa CAF Confederation Cup Total Energies 2021/2022 mufitanye na RS Berkane yo muri Maroc tariki ya 28/11/2021 ihagije. Bityo uwo mukino wanyu uzakinwa nk’uko byari biteganyijwe.”
Nyuma yaho uyu mukino ugomba gukinwa bivuze ko APR FC izakina na Rayon Sports tariki ya 23 Ugushyingo mu gihe undi mukino wo uzakinwa ku itariki ya 28 Ugushyingo ihura na RS Berkane, mu gihe umukino wo kwishyura wo uzabera muri Maroc tariki ya 5 Ukuboza 2021.
Uyu mukino w’umunsi wa Kane wa Shampiyona APR FC yifuzaga ko ukurwaho, uzakinwa nk’uko byari btieganyijwe ariko umunsi wa gatatu wo yagombaga gusura ikipe ya Etincelles FC wo ntabwo izawukina kubera ko FERWAFA yatangaje ko imikino yagombaga kubera kuri Sitade Umuganda itazaba kuko iyo sitade yangijwe n’umutingito.
