Ikipe y’igihugu ya Angola itwaye igikombe cya Afurika cy’ibihugu mu mukino wa Basketball ku bakinnyi batarengeje imyaka 18 nyuma yo gutsinda Misiri amanota 86-82 ku mukino wa nyuma wakinwaga ku mugoroba wo kuri iki Cyumweru kuri sitade nto ya Remera.
Uyu mukino ukaba wanitabiriwe n’Umukuru w’Igihugu Nyakubahwa Perezida Paul Kagame.
Angola yatwaye igikombe itsinze Misiri amanota 86-82
Nyakubahwa Paul Kagame perezida wa Repubulika y’u Rwanda niwe wahereje ikipe y’ Angola igikombe
Uko umukino wagenze
Angola yatangiye agace ka mbere iri hejuru inakarangiza iyoboye n’amanota 25-16, agace ka kabiri karangira ikiri imbere n’amanota 41-40. Amakipe ajya kuruhuka.
Mu gace ka gatatu ikipe ya Misiri yongereye imbaraga irangiza ifite amanota 61-58 ariko Angola ibifashijwemo na kizigenza Soussa Silvio Samuel na Fermandes Bruno, yahise izamukana Misiri ku buryo iminota 40’ y’umukino yarangiye amakipe yombi anganya amanota 77-77.
Byabaye ngombwa ko bongeraho iminota itanu (5).Mu minota itanu ikipe ya Angola yatsinzemo amanota 9 naho Misiri itsindamo amanota 5, bityo Angola ihita igira amanota 86 kuri 82 ya Misiri.
