Urukiko ruburanisha ibyaha by’ubukungu mu Misiri, kuri uyu wa 16 rwatangiye kumva urubanza ruregwamo Issa Hayatou wahoze ayobora Impuzamashyirahamwe y’umupira w’amaguru muri Afurika, CAF.
Uyu mugabo ashinjwa ko yarenze ku mategeko agena uburenganzira bungana mu guhatana ku isoko, ubwo yatangaga isoko rya miliyari y’amadolari ya Amerika rijyanye no kwerekana no kumenyekanisha ibikorwa bya ruhago yo kuri uyu mugabane, ryahawe ikigo Lagardère Sports cyo mu Bufaransa.
Muri uru rubanza rwagiye rusubikwa kenshi mu mezi 13 ashize, Issa Hayatou wayoboye CAF guhera mu 1988 kugeza mu 2017 n’uwari Umunyamabanga mukuru, Hicham El Amrani, bashinjwa n’ubuyobozi bwa Misiri ifite icyicaro cya CAF ko barenze ku mategeko mu gutanga iryo isoko.
Ni amasezerano yasinyweho na Issa Hayatou na Hicham El Amrani mu izina rya CAF hamwe n’ikigo Lagardère Sports ku wa 28 nzeri 2016, agiha uburenganzira bwo kugurisha uburenganzira bwo kwerekana no kumenyekanisha umupira w’amaguru wa Afurika hagati ya 2017-2028.
Ikigo cyo mu Misiri, Presentation Sports (PS), kivuga ko cyashakaga guhatana na Lagardère Sports muri iryo soko ariko ngo byaje kumenyekana ko muri icyo gihe CAF na Lagardère Sports bari baramaze kwinjira mu biganiro guhera ku wa 12 Kamena 2015, cyane ko icyo kigo aricyo cyari kirisanganwe guhera mu 2008 agomba kurangira mu 2016.
Nk’uko RFI yabitangake, ngo habanje kuregerwa urwego rushinzwe kugenzura ihatana ry’ibigo (ECA), ruza kwemeza ko abo bayobozi babiri baregwa mu rukiko rukurikirana ibyaha by’ubukungu, binashyigikirwa n’Umushinjacyaha Mukuru muri Werurwe 2017.
CAF yatangaje ko yiteguye kuburana uru rubanza ivuga ko kuvuga ko habayemo uburiganya nta shingiro bifite.
Yakomeje igira iti “CAF izarwanirira umwanya wayo, uburenganzira n’izina ifite ikoresheje inzira zose z’amategeko mu butabera mpuzamahanga.”
Issa Hayatou yatakaje ubuyobozi bwa CAF ku wa 16 Werurwe nyuma yo gutsinda amatora na Ahmad wo muri Madagascar, mu matora yabereye Addis-Abeba muri Ethiopia. Uyu mugabo yahise yisubirira mu Majyaruguru ya Cameroon mu gihugu akomokamo, aho ayobora Ishuri ry’Igihugu ry’Umupira w’amaguru, Anafoot.
Hicham El Amrani nawe yahise yegura ubwo Ahmad yari amaze gutsinda amatora. Ubu niwe uyoboye ibikorwa byo guhatanira ko Maroc nk’igihugu akomokamo cyazakira igikombe cy’Isi mu 2026.
Gusa hari amakuru ko Ahmad yaba aherutse kwemeza ko amasezerano agejeje aba bagabo mu nkiko yaba ari kongera kuganirwaho bundi bushya.
