Imikino y’igikombe cya Afurika mu mupira w’amaguru mu bagabo yaraye itangiye mu gihugu cya Cameroon, ni nyuma y’imyaka 50 yari ishize ki gihugu cyakiriye igikombe cya Afurika n’ubundi.
Mu mikino yaraye ikinwe ikipe ya Cameroon yari iri mu rugo yatangiye neza itsinda ikipe ya Burkinafaso ibitego 2-1, mu wundi mukino ikipe ya Cape verde bari kumwe muri iryo tsinda yo yaraye itsinze Ethiopie igitego kimwe ku busa.
Ku mukino wabanje wahuje Cameroon ndetse na Burkinafaso wagiye gutangira hari impaka nyinshi by’umwihariko kuri Burkinafaso yari yapimwe usanganwa abantu 9 banduye Koronavirusi ariko bo bakaba batarabifashe nk’ukuri kuko basabye ko bongera gupimwa, ibyo byarakozwe bamwe mubo bari bayisanganye basanga ari bazima.
Mu gutangira k’uyu mukino, Burkinafaso niyo yatangiye neza kuko ubwo hari ku munota wa 24 gusa nibwo Gustavo Sangare yafunguye amazamu ya Cameroon.
Iki gitego cyaje kwishyurwa kuri Penaliti ubwo hari ku munona wa 40, ni igitego cyatsinzwe na Kapiteni wa Cameroon Vincent Aboubacar ndetse waje no kongera kubona ikindi gitego ubwo hari ku munota wa 45 nanone agitsinze kuri Penaliti.
Mu wundi mukino wakurikiyeho, ikipe ya Capeverde yabonye itsinzi ubwo bahuraga na Ethiopie igitego kimwe ku busa cyatsinzwe na Julio Tavares, ni igitego cyatsinzwe ubwo hari ku munota wa 45 w’umukino.
Kuri uyu wa mbere, imikino y’igikombe cya Afurika irakomeza hakinwa imikino yo mu itsinda rya kabiri ndetse n’irya gatatu.
15h00: Senegal vs Zimbabwe
18h00: Guinea vs Malawi
18h00: Morocco vs Ghana
21h00: Comoros vs Gabon
