Impamvu y’uruzinduko rwa Sam Kutesa mu Rwanda

Mu nama y’iminsi itatu yabereye I Kampala ahitwa  Munyonyo,  yo kugarura amahoro n’ituze muri  DR Congo no mu karere  yari yitabiriwe na ba Perezida  Salva Kiir, wa Sudan y’Amajyepfo , Perezida Museveni wa Uganda , Minisitiri wungirije w’Ingabo muri Afrika y’Epfo Mosiviwe Mapisa-Nqakula,  Perezida wa Zambia  Edgar Lungu,  Visi Perezida w’u Burundi Gastor Sindimwo,  Minisitiri w’Intebe wa DRC Clement Mouamba n’abandi ….

Ikaba yaranaganiriwemo ku byerecyeranye n’isahura ry’umutungo kamere  y’agaciro wo muri icyo gihugu  ritemewe n’amategeko rihabera , gucyura abahoze ari ingabo z’umutwe witwara gisirikare wa  M23 n’impunzi zibarizwa muri kano gace.

Bivugwa ko Perezida  Museveni ariwe ugiye kuba ushinzwe kuyobora urwego rushinzwe ibirimo kubera muri DR Congo ndetse n’aka karere.

Perezida Museveni yavuze ko azavugana na mugenzi we Perezida Joseph Kabila  ku birebana n’umutekano muke urangwa muri DR Congo, ugira ingaruka no ku bihugu by’ibituranyi. Ati : “Ntabwo abanyafurika bemera gahunda yo kwivanga mu bibera mu bindi bihugu. Ariko kandi ku kibazo cya DR Congo, ibibazo bibera muri icyo gihugu bigira ingaruka ku baturanyi , kandi bimaze igihe kirekire akaba ari muri uru rwego ibibazo biterwa n’ibyagaragajwe haruguru byambukaga natwe bikatugeraho,”.

“Nk’umuntu ugiye kuba ashinzwe kureba uko amahoro aganza muri kano gace, umutekano n’ubutwererane muri DR Congo ndetse n’akarere, nzavugana na Perezida Kabila mu rwego rwo gushakira hamwe icyakorwa, ku birebana n’abaterabwoba baba muri DR Congo,” Perezida Museveni akaba yarabivuze ubwo yasozaga iyo nama ku wa 26 Ukwakira 2018.

Mu itangazo ryashyizwe ahagaragara na Minisitiri w’ububanyinamahanga wa Uganda Sam Kutesa, inama yategetse ko abahoze ari ingabo za M23 bacyurwa iwabo muri DR Congo.

Ingabo za LONU zishinzwe gutabara aho rukomeye

Perezida wa Zambiya Edgar Lungu wari uhagarariye umuryango wa Afurika y’amajyepfo SADC yasabye ko ingabo za LONU zaterwa ingabo mu bitugu, itewe n’uko kenshi zakunze kugabwaho ibitero n’inyeshyamba zo muri Uganda zizwi  nka Allied Democratic Forces (ADF), zifite ibirindiro muri DR Congo.

Ingabo za LONU zishinzwe gutabara aho rukomeye, zifite inshingano yo kurwanya inyeshyamba, zigizwe n’ingabo zikomoka muri Malawi, Afurika y’Amajyepfo na Tanzaniya.

Ni muri uru rwego Perezida Paul Kagame yakiriye Minisitiri w’Ububanyi n’Amahanga wa Uganda  Sam Kutesa,  kuri uyu mugoroba wo kuwa kane tariki ya 25 Ukwakira 2018, bivugwa ko yari akubutse  muri DR Congo  ku bonana na Perezida Kabila, Sam Kutesa wari ufite ubutumwa bwihariye bwa Perezida Yoweri Museveni nk’uko Ambasade ya Uganda mu Rwanda yabitangaje.

Ntihatangajwe imiterere y’ubwo “butumwa bwihariye” Museveni yoherereje Perezida Paul Kagame kuri uyu wa Kane.

Minisiteri y’Ububanyi n’Amahanga ya Uganda yifashishije Twitter, yatangaje ko “baganiriye ku bibazo bireba ibihugu byombi kandi bakiyemeza gukorera hamwe hagamijwe gushimangira no kwagura ubutwererane hagati ya Uganda n’u Rwanda.”

Bivugwa ko Sam Kutesa ava mu Rwanda yerekeza I Burundi.

Muri iyi minsi hari amakuru avuga ko Ingabo za Uganda  zisaga ibihumbi bitatu  zo mu mutwe kabuhariwe [Forces spéciales ] zatorejwe muri Somalia, zishobora kwinjira muri Congo mu rwego rwo guhashya Allied Democratic Forces (ADF), kurundi ruhande ariko bikavugwa ko ari mu rwego rwo kwiyegereza  imipaka ya Congo n’u Rwanda kugirango nibiba ngombwa  Uganda ibe yagaba ibitero biyoroheye kubutaka bw’u Rwanda.  Ni mugihe mu Burundi hari Bataillon y’ingabo  za Uganda ziri mu mutwe w’abarinda Perezida Nkurunziza no mu zindi nzego nkuru za Leta.

Uguhura kw’aba bombi kuje nyuma y’igihe hari Abanyarwanda bafatirwa muri Uganda ku mpamvu zidasobanutse, bagafungwa ndetse bagakorerwa iyicarubozo, bakaza kurekurwa ariko abandi bakaba bagifunze.

Perezida Kagame ku wa 25 Werurwe 2018 yari yaganiriye na Yoweri Kaguta Museveni wa Uganda ku bibazo by’umutekano n’imibanire irimo agatotsi ivugwa hagati y’ibihugu byombi, iterambere n’ibindi biri mu nyungu z’ibihugu byombi.

Museveni yavuze ko mu ntangiriro z’umwaka ubwo yahuriraga na Perezida Kagame i Addis Ababa, yamugaragarije urutonde rw’ibimenyetso ko hari Abanyarwanda bafungiye muri Uganda, agira ati “Uyu munsi nabisubije byose.”

Ku kibazo cy’umubano ukonje, Museveni yavuze ko gishingiye ku kutavugana no kudakorana bya hafi.

U Rwanda kandi rushinja Uganda ko hari abantu benshi bafite umugambi wo kuruhungabanyiriza umutekano bakorera mu icyo gihugu cy’abaturanyi, ibintu rusaba ko byahagarara.

Hakiyongeraho n’ikibazo cy’abantu 40 baheruka gufatirwa ku mupaka wa Uganda na Tanzania bagiye mu myitozo ya gisirikare muri RDC banyuze mu Burundi, ngo bazahungabanye umutekano w’u Rwanda.

Muri Congo  Kivu y’Epfo, yabaye indiri y’imitwe yitwaje intwaro n’urubyiruko rwa  RNC ya Kayumba Nyamwasa , ruturuka muri Uganda , RED Tabara na  FOREBU z’Abarundi, Mai-Mai, Twirwaneho n’iyindi…myinshi.  iyi mitwe rero ikaba ifatwa nk’igisasu cya Grenade gitabye ahantu kuburyo isaha iyo ariyo yose cyaturika bikaba byakongeza umuriro aka karere kose. Imana itabare akarere kacu.