Ikipe ya APR FC yatsinze umukino wa mbere mu ya gisirikare ikomeje kubera mu Rwanda, aho kuri iki Cyumweru, yakinaga na Simba ihagarariye Uganda, iyitsinda ibitego 2-0.
Muri uyu mukino wa kabiri ku mpande zombi, wabereye kuri Stade Regionale i Nyamirambo, umutoza wa APR FC Kanyankore Gilbert ’Yaounde’ yari yakoze impinduka enye; aho Rusheshangoga Michel, Yannick Mukunzi, Nkinzingabo Fiston ndetse na Blaise Itangishaka babanjemo.
Usengimana Faustin yari ayoboye bagenzi be mu kibuga nyuma yaho Ngabo Albert ahaye umwanya Rusheshangoga, mu gihe Yannick Mukunzi yatangiye mu mwanya wa Amran Nshimiyimana ufite imvune.
Nkinzingabo Fiston na Itangishaka Blaise bakinnye mu mwanya wa Patrick Sibomana na Benedata Janvier, bituma Muhadjiri asa n’usubira inyuma gato.
Igice cya mbere cyarangiye amakipe yombi anganya ubusa ku busa, ariko APR FC ibona ibitego bibiri mu gice cya kabiri.
Ku munota wa 60 w’umukino, Hakizimana Muhadjiri yahaye umupira Habyarimana Innocent ‘Di Maria’, atsinda igitego cya mbere, mu gihe icya kabiri yagitsinze ku mupira yahawe na Twizerimana Onesme.
APR FC ikaba igize amanota atatu n’igitego kimwe, Ulinzi Stars na Tanzania bafite amanota atatu nta mwenda, nta n’igitego mu gihe Simba ya Uganda ifite amanota atatu n’umwenda w’igitego kimwe.
Abakinnyi 11 babanjemo ku mpande zombi:
APR FC: Emery, Rusheshangoga, Rugwiro, Faustin (c), Emmanuel, Mukunzi, Nkinzingabo, Muhadjiri, Onesme, Blaise, na Di Maria.
Uganda: 1 Mugabi Alex, 6 Kirya Aggrey, 12 Mubiru Issa , 4 Sekitoleko Dennis , 3 Othieno Joseph, 5 Mussa Mude (c). 17 Aloro Rodgers, 7 Witaba Alex, 15 Wakaza Godfrey, 9 Senkaaba Gorge na 11 Omunuki Robert.
Ruhagoyacu
