Ingabo za Callixte Sankara , Rusesabagina na Col. Wilson zigambye igitero cyo muri  Nyaruguru

Nyuma yaho Polisi y’u Rwanda itangarije ko abagabye igitero cyo gusahura abaturage mu Karere ka Nyaruguru baturutse mu Burundi, bakanyura mu ishyamba rya Nyungwe riri hagati y’ibihugu byombi, ari na yo nzira baciye basubira mu gihugu cyabo.

Ibi bikaba byarabaye mu ijoro  ryo ku itariki 1 Nyakanga 2018 mu gihe cya saa 23h30 ubwo abagizi ba nabi bitwaje intwaro bateye mu Karere ka Nyaruguru, Umurenge wa Nyabimata, Akagari ka Ruhinga mu mudugudu wa Cyamuzi.

Bibye ibintu by’abaturage birimo amatungo n’ibiribwa, banarasa hejuru bagamije gutera ubwoba abaturage.

Mu itangazo Polisi y’u Rwanda yashyize ahagaragara, yavuze ko banashimuse bamwe mu baturage ngo babatwaze ibyo bibye, baza kubarekura bamaze kotswa igitutu n’abashinzwe umutekano bahise batabara.

Yakomeje igira iti “Abo bagizi ba nabi bateye baturutse mu gihugu cy’u Burundi banyuze mu ishyamba rya Nyungwe, ari nayo nzira banyuze basubirayo. Ibi bikaba bibaye nta n’ibyumweru bibiri bishize mu karere kamwe habaye igitero nk’iki.”

Polisi y’u Rwanda yavuze ko inzego z’ibanze n’izishinzwe umutekano bakoranye inama n’abaturage bakabahumuriza.

Yakomeje igira iti “Turasaba abaturage gukomeza gufatanya n’inzego z’umutekano, bahana amakuru kugira ngo abo bagizi ba nabi bamenyekane.”

Mu itangazo abiyita Mouvement Rwandaise Pour le Changement Democratique [ MRCD ] mu izina ry’ umutwe w’ingabo FLN- Forces de Libération Nationale, ryashyizweho umukono na Callixte N. SANKARA wiyise Major. Ndetse akavuga ko ryakorewe i Nyamagabe, taliki ya 15 Nyakanga 2018. Ariko amakuru Rushyashya yatohoje ahamya ko iri tangazo ryakorwe I Burundi.

Muri iri tangazo bahamya ko aribo bagabye igitero cyo gusahura Abaturage Nyamagabe, Nyaruguru ngo na Bugesera ndetse na Huye.

Visi-Perezida wa 2 wa MRCD akaba n’Umuvugizi wa FLN  Calixte Sankara nyuma yo kwirukanwa mu ishyaka rya RNC, ya Kayumba Nyamwasa muri Afrika y’epfo yahise ashinga irye shyaka RRM,arifatanyije na Noble Marara uyobora Inyenyerinews,ariko batamaranye kabiri, Sankara ararishimuta,  nyuma yo guhungira I Burundi avuye Uganda, yishyize hamwe n’ishyaka PDR-Ihumure rya Paul Rusesabagina uterwa inkunga na Dr. Eliel (Nataki) Ntakirutimana muganga w’umuherwe ny’iri ibitaro « HOPITAL LAREDO » biba i Texas, uyu nimwene Pasteur Ntakirutimana bakaba aba nya Kibuye.

Basanga mu ishyamba CNRD-Ubwiyunge ya Col. Wilson Irategeka wahoze muri FDLR ikaza gucikamo ibice, bakora ihuriro ryabyaye umutwe w’ingabo FLN- Forces de Libération Nationale. Sankara yiyita umusilikare atyo atarakoze n’Igisukuti.

Uyu Calixte Sankara avuka I Nyanza hakurya ya gereza ya Mpanga, akaba yarize I Butare muri Kaminuza y’u Rwanda, yaje kwirukanwa  kuri Kaminuza muri 2007,  kubera amacakuri yashyiraga mu banyeshuri, aribwo yahise ajya gushakisha imibereho muri Afrika y’Epfo, aza guhura na Col.Patrick Karegeya wamwinjije muri RNC, aho apfiriye Sankara aza kunaniranwa na  Kayumba Nyamwasa bapfa imisanzu yakuzanywaga mu mpunzi  kubera inzara n’ubukene byugarije RNC- ishaje, Sankara yajyanye n’uwitwa Casimir Nkurunziza, ari  nawe wabimburiye abandi kwegura muri RNC yo mu karere ka Cape Town, nyuma yaho Twihangane Pacifique Shareef wari ushinzwe ubukangurambaga mu ihuriro RNC mu karere ka western Cape (CAPE TOWN) nawe yaje kwegura.

Aba bakaba baraje gusanga Umuhanzi Sankara Callixte usanzwe uzwi cyane nka Bikindi wa MRND- RNC, ubwo yari ageze muri Uganda batangira ubukangurambaga ari nako babeshya urubyiruko rw’Abanyarwanda mu bice bitandukanye bya Uganda nka Nyakivala, Kiboga, Kibale na Mubende, bafatanyije n’aba RNC, barimo Musoni Jeffrey, Bijura Moses, Felix Mwizerwa na Dr. Sam Ruvuma. Byaje kunanirana ko bahuza umutwe umwe w’ ingabo iza Kayumba zigizwe n’abanyamulenge bake zerekeza muri Congo naho abandi bake basanga Sankara na Col. Wilson Irategeka mu kibira mu Ntara ya Cibitoki- Burundi.

Abo bose bavugaga ko bagamije gushinga umutwe w’ingabo, ariko muri abo bose uzwi wabaye umusilikare ni Musoni watorotse Ingabo z’u Rwanda afite ipeti rya Sergeant na Bijura usanzwe ari umupasiteri ahitwa Rubare muri Ntungamo, aba bo bafatanywe n’abandi i Kikagati, Sankara ari ruka ari nabwo yahise ajya I Burundi.

Uwabimburiye abandi gusanga Calixte Sankara ni umunyenyanza iwabo wa Sankara witwa Herman Nsengimana, umuvandimwe wa Gérard Niyomugabo nawe yafashe iyi shyamba nyuma yaho murumunawe  aburiwe irengero kuva muri Mata 2014, akaba yari mu mugambi wo kugirira nabi ubutegetsi buriho hamwe na bagenzi  be barimo Kizito Mihigo, Jean Paul Dukuzumuremyi na Cassien Ntamuhanga baje gutabwa  muri yombi, aba bose bakaba barinjijwe muri RNC na Sankara kubufatanye na Gerard Niyomugabo.

Kugeza ubu ntawe uzi niba Gerard Niyomugabo nawe ari muri uyu mutwe w’ingabo ukorera I Burundi  n’ubwo mukuru we Herman Nsengimana kuri Video igaragara kuri youtube atunga agatoki bamwe mu bashinzwe umutekano, Kizito we ubu ari mu rukiko aho azakomeza kuburana mu bujurire we na Jean Paul Dukuzumuremyi mu gihe Cassien Ntamuhanga , yatorotse gereza.

Aba bose ariko icyo bahuriyeho ni uguhungabanya umutekano w’u Rwanda, umuterankunga mukuru ni FDLR, RNC, RUJUGIRO Tribert n’abafatanya bikorwa babo ku nyungu zabo bwite bakoresha aya mabandi yananiwe kubana n’abandi muri Sosiyete nyarwanda bakanyura inzira y’ubuhumyi yo guhungabanya umutekano w’u Rwanda nkaho ababigerageje kuva 1996,7,8 bagigezeho.

Turacyakurikirana aya makuru……