Nyuma y’imyaka 12 amaze muri Manchester United ku mikino 532, ibitego 246, Wayne Rooney kapiteni wa Manchester United n’ikipe y’igihugu y’u Bwongereza, yamaze kubwirwa n’umutoza José Mourinho ko atagikenewe muri iyi kipe yambara umutuku.
José Mourinho utoza Manchester United kuva muri uyu mwaka w’imikino 2016-2017, yibiye ibanga abagira inama Rooney ababwira ko uyu mugabo atazabona umwanya wo gukina muri Manchester United ahubwo ko byamubera byiza avuye muri iyi kipe mu gihe yaba ashaka umwanya uhoraho nkuko ikinyamakuru The Sun dukesha iyi nkuru kibivuga.
Imikino myinshi yakinnye uyu mwaka yajyaga mu kibuga asimbuye
Wayne Rooney amaze imikino ine (4) ya shampiyona yikurikiranya atabanza mu kibuga. Ku mukino wo ku Cyumweru batsinzwemo na Chelsea ibitego 4-0, Rooney ntiyakinnye kubera ikibazo afite ku mukaya(Muscle) wo ku itako.
Wayne Rooney w’imyaka 31 y’amavuko, yageze muri Manchester United mu 2004 avuye mu ikipe ya Everton asanzwe anafana. Gusa kuri ubu aratangira gutekereza ku mashampiyona atandukanye arimo Major League Soccer shampiyona yo muri Amerika ndetse n’u Bushinwa.
