Nyuma yaho yiswe BK Arena ivuye ku izina rya Kigali Arena, iyi nyubako iri i Remera ifite ubushobozi bwo kwakira abantu ibihumbi 10, Mu gihe cy’iminsi itatu iyi nyubako igiye kwakira imikino yo kwishyura yo gushaka itike y’igikombe cy’Isi “2023 FIBA Basketball World Cup, African Qualification”.
Ni imikino iri buhuze ibihugu umunani aribyo u Rwanda, Cape Verde, Nigeria, Uganda, Mali, Sudan, Tunisia na Cameroon.
Iri jonjora rya kabiri rigiye kubera mu Rwanda mu gihe iriheruka ryabereye muri Senegal ikipe y’u Rwanda yatsinzwe imikino itatu yose yahakiniye ubu rukaba ruri ku mwanya wa nyuma mu itsinda rya kabiri.
I Kigali hagiye kubera imikino yo mu itsinda rya mbere rya A ndetse n’irya kabiri rya B, biteganyijwe ko imikino itangira kuri uyu wa gatanu ku isaha ya Saa sita z’amanywa aho ikipe ya Nigeria ariyo ibanza mu kibuga igakina na Cape verde.
Uyu mukino urakurikirwa n’uhuza Uganda na Mali Saa cyenda, naho ku isaha ya Saa kumi n’Ebyiri u Rwanda rurakina na South Sudan , umukino usoza umunsi wa mbere ni Tunisia ikina na Cameroon.
Biteganyijwe ko imikino izakomeza kuri uyu wa gatandatu ndetse no ku cyumweru yose ikazajya ibera mu Nyubako ya BK Arena guhera ku isaha ya Saa Sita z’Amanywa.
