Umukinnyi w’inyuma ku ruhande rw’iburyo mu ikipe y’ingabo z’igihugu ya APR FC Ombolenga fitina agiye kumara ibyumweru bine atagaragara mu kibuga kubera imvune yagiriye mu mukino ikipe y’igihugu y’u Rwanda Amavubi yakinagamo n’ikipe y’igihugu ya Uganda.
Nk’uko bigaragara ku rubuga rwa Internet rwa APR FC, mu gitondo cyo kuri uyu wa kane tariki ya 14 Ukwakira 2021, nibwo batangaje ko uyu mukinnyi nyuma yo kwitabwaho n’abaganga ba APR FC azamara ibyumweru bine adakina.
APR FC yagize iti “Nyuma yo kugirira imvune muri uwo mukino Ombolenga yitaweho n’abaganga basanga yaragize ikibazo mu kagombambari ahabwa ibyumweru bine binatumye atazagaragara mu mukino ikipe ya APR FC izakina na Etoile Du Sahel yo muri Tunisia.”
Si Fitina wenyine ufite ikibazo cy’imvune kizatuma adakina umukino ubanza na Etoile Sportive du Sahel mu mpera z’iki cyumweru kuko na rutahizamu Byiringiro Lague nawe ntabwo ameze neza ku buryo yakina uyu mukino, biravugwa ko uyu mukinnyi ashobora kuzagaruka mu kibuga mu mpera z’uyu mwaka.
Ikipe y’ingabo z’igihugu ikaba ikomeje imyiteguro irimo gukorera kuri Sitade ya Kigali I Nyanirambo aho yitegura imikino ya CAF Champions League aho tariki 16 ukwakira iyi kipe igomba gucakirana na etoile Du Sahel mu mukino ubanza.
