Mu gitondo cyo kuri uyu wa Kabiri tariki ya 26 Ukwakira 2021, ikipe ya Simba SC yo mu gihugu cya Tanzania yamaze gutandukana n’uwari umutoza wayo Didier Gomes Da Rosa nyuma yo kunanirwa kugeza iyi kipe mu matsinda ya CAF Champions League dore ko yasezerewe na Joaneng Galaxy yo muri Botswana mu mpera z’icyumweru gishize.
Nyuma y’ibiganiro ku mpande zombi, binyuze ku itangazo iyi kipe yashyize hanze yifashishije imbuga nkoranyambaga zayo, Simba SC yatangaje ko yatandukanye na Didier Gomes Da Rosa wari umutoza wayo, ni nyuma y’uko uyu mutoza ngo yanditse ibaruwa asaba gutandukana n’iyi kipe iyoborwa na Barbara Gonzalez.
Muri iryo tangazo Simba SC yatangaje ko uwari umutoza wungirije Thierry Hitimana w’umunyarwanda agiye kuba afashe iyi kipe by’abateganyo ndetse akazaba yungirijwe na Selemani Matola, basoza kandi bashima Gomes ku bw’ibihe bitandukanye ndetse n’umusaruro bagezeho bari kumwe nawe.
Didier Gomes Da Rosa w’imyaka 52 y’amavuko, atandukanye na Simba SC yaari yagezemo muri uyu mwaka ariko akaba yarananiwe kugeza iyi kipe mu matsinda ya CAF Champions League y’uyu mwaka kuko mu mukino yakinnye na Juaneng Galaxy yo muri Botswana yabatsinze ibitego 3-1 mu mukino wo kwishyura wabereye muri Tanzania kandi Simba yari yatsindiye mu gihugu cya Botswana ibitego 2-0.
