Umukino Nkurunziza na Museveni barimo wo kuvanga u Rwanda mu bibazo byabo uzabageza he?

Muriyi minsi nta gihe kiri gushira hatumvikanye mu bitangazamakuru Perezida w’u Burundi Petero Nkurunziza kenshi ashyira mu majwi u Rwanda mu rwego rwo gukomeza ayobya uburari ku bibera mu gihugu cye.

Ibi byongeye nyuma yaho taliki 04 Ukuboza Nkurunziza yandikiye ibaruwa mugenzi we wa Uganda ashinja u Rwanda kuba inyuma y’ibibazo biri mu Burundi. Nyuma yaho iyi baruwa yaje gukwirakwizwa mu bitangamakuru ndetse no ku mbuga nkoranyambaga, mu gihe itari ibaruwa ifunguriwe rubanda.

Igitangaje umuntu yakwibaza ni uburyo u Burundi bukomeje gukurura u Rwanda mu bibazo byarwo amahanga amaze kubona ko biterwa n’ubutegetsi buriho; ikindi gitangaje ni uburyo ibaruwa ivuye k’umukuru w’igihugu ikajya ku wundi isakara mu bitangazamakuru no ku mbuga nkoranyambaga, bigatera kwibaza inyungu irimo.

U Burundi bubifitemo nyungu ki?

Leta y’u Burundi yamaze kubona ko amahanga amaze gusobanukirwa amabi abera mu Burundi, bityo leta ikaba igishakisha uko yakurura abaturanyi mu bibazo ngo amaso ahanze Nkurunziza atatanire mu baturanyi. Si ibi gusa kuko Nkurunziza amaze kubona ko mugenzi we wa Uganda yamubera intwaro ikomeye kubera atarebana neza n’u Rwanda, ruhora rumwerurira ko aha urwaho abashaka kurubangamira. Nkurunziza amaze kubona ko ubufatanye bwe na Museveni bwamuha imbaraga mu kuzana u Rwanda mu bibazo bye dore ko ubu Museveni ariwe uyoboye umuryango w’ibihugu byo muri Afurika y’iburasirazuba (EAC) akaba afite ijambo muri uyu muryango u Rwanda rubarizwamo.

Uganda ifitemo nyungu ki?

Leta ya Uganda kuba yakwandikirwa ibaruwa iyigaragariza ibivugwa ku Rwanda ibibona nk’amahirwe, binatuma umuntu yibaza uwaba ri inyuma yo gushyira ku karubanda iyi baruwa ivugamo u Rwanda bisanzwe bizwi ko rutabanye neza na Uganda. Nta gitangaza kuri Uganda iramutse ibikoze cyane ko kuriyo ari amahirwe kubona u Rwanda rugarukwaho mu bibazo by’u Burundi.

U Rwanda mur’ibi byose ruhagaze he?

Leta y’u Rwanda ntabwo yigeze ihwema kugaragariza amahanga ko ibibazo by’abarundi aribo nyirabayazana ariko ko bigira ingaruka ku karere. Nyakubahwa Perezida Paul Kagame mu kiganiro na Jeune Afrique cyabaye taliki 4 Gicurasi 2017 mu biro by’Umukuru w’Igihugu ku Kacyiru muri “Village Urugwiro”, yabajijwe kuri Nkuruniza agira ati: “Iyo umuntu afite ikibazo agashaka kukiguturaho, ni byiza ko wirinda kugwa muri uwo mutego. Ibi ntabwo bisobanuye ko kuba twarifashe tutumva ko ikibazo kitureba. Tuzi ko ibibera mu Burundi bishobora kugira ingaruka ku mutekano wacu, kandi ntidushobora kwemera ko ibyo bitugeraho.

Abanyarwanda kenshi bakunda kuvuga ko ubusanzwe ntawurahemukira u Rwanda ngo agire amahoro kuko buri gihe bimukurikirana kugeza abonye ingaruka zabyo.

Turabararikira gukurikirana inkuru zizakurikira zisesengura neza ibiri inyuma y’ibikorwa nk’ibi byo gushotorana ndetse no guharabika abaturanyi biri gukorwa ku ruhande rumwe na Nkurunziza no ku rundi ruhande bigakorwa na Museveni ariko noneho bakaba baratangiye ubufatanye busesuye mu migambi yabo mibisha ku Rwanda.