Polisi yo muri Uganda irimo gushakisha umushoferi wari utwaye imodoka akagonga umuyobozi wa Polisi mu gace ka Kyebando, agahita apfa.
Polisi itangaza ko ibi byabaye ku wa Kabiri tariki ya 15 Gicurasi 2018, Francis Kato wari umuyobozi wa polisi mu gace ka Kyebando agongwa n’imodoka yihutaga cyane iva mu cyerekezo cya Kira.
Umuyobozi wa polisi ishami ryo mu muhanda mu gace ka Kira, Mr Michael Kasigyire, aganira na Daily Monitor, yemeje aya makuru agira ati “polisi ishami ryo mu muhanda mu gace ka Kira, tubabaje no gutangaza urupfu rwa ASP Kato, wari umuyobozi wa polisi i Kyebando, yagonzwe n’umuntu utaramenyekana wari utwaye imodoka yihuta cyane,… aruhukire mu mahoro”.
Mu Ugushyingo 2017, nabwo uwari umuyobozi wa polisi (Mukono- Division), Rwego Muhoozi yishwe n’impanuka y’imodoka mu muhanda Ntenjeru-Katosi, ubwo yirukankanaga igisambo.
