Kuri uyu wa Kabiri tariki 19 Mata 2016, nibwo shampiyona y’icyiciro cya mbere yakomezaga ku munsi wayo wa 17 ukaba n’umunsi wa kabiri w’imikino yo kwishyura, Kiyovu Sports ikaba yatsinze Espoir igitego 1- 0 ku kibuga cyo ku Mumena.
Kiyovu Sports yagumye ku mwanya wa 6 n’amanota 29 mu mikino 17 imaze gukina, mu gihe ikipe ya Espoir FC iri ku mwanya wa 12 n’amanota 16 ku mwenda w’ibitego 9 ibazwa. Aya manota Kiyovu ikaba iyanganya na As Kigali izacakirana na Rayon Sports kuri uyu wa Gatatu.
Undi mukino wari uteganyijwe kuri uyu wa Kabiri, ikipe ya AS Muhanga iri ku mwanya wa nyuma yatsinze itababariye Amagaju FC kuri sitade Muhanga ibitego 4-1.
Indi mikino y’uyu munsi wa 17 wa shampiyona izakomeza kuri uyu wa Gatatu tariki 20 Mata 2016. Aha, hari imikino ibiri itoroshye aho ikipe ya Mukura VS igomba kwakia APR FC naho Rayon Sports yo ikazaba yisobanura na AS Kigali kuri stade ya Kigali guhera saa cyenda n’igice.
Imikino iteganijwe none kuwa gatatu tariki 20 Mata 2016.
Bugesera FC vs Police FC ( Nyamata, 15 :30’)
Mukura VS vs APR FC (Stade Huye, 15 :30’)
Etincelles vs Rwamagana City(Stade Umuganda, 15 :30’)
Gicumbi FC vs Musanze FC(Gicumbi, 15 :30’)
AS Kigali vs Rayon Sports (Stade ya Kigali, 15:30’)
Sunrise FC vs Marines FC( Rwamagana, 15:30’)
