Ku gicamunsi cyo kuri uyu wa gatatu tariki ya 17 Ugushyingo 2021, ikipe ya Rayon Sports ya yano mu Rwanda yakinaga n’ikipe ya Ibanda FC yo muri Repubulika ya Demokarasi ya Congo mu mukino wa gicuti wabereye kuri Sitade Amahoro urangira ari ubusa ku busa.
Ni umukino wakinwe mu rwego rwo kwitegura umunsi wa gatatu wa shampiyona y’u Rwanda ku ikipe ya Rayon Sports ndetse na shampiyona yo muri RDC ku ikipe ya Ibanda isanzwe ibarizwa mu mujyi wa Bukavu.
Muri uyu mukino, ku ruhande rwa Rayon Sports yatangiye isa niyakoze impinduka mu bakinnyi basanzwe babanzamo aha twavuga nk’umunyezamu Bashunga Abouba ariwe wari kapiteni, hari kandi abandi bakinnyi bagaragaye muri uyu mukino batari basanzwe babanzamo aha twavuga nka Mico Justin, Manasseh Mutatu Mbedi n’abandi.
Ikipe ya Rayon Sports yakabaye yabonye igitego mu minota ibanza y’igice cya mbere, ubwo umukinnyi Willy Onana yakorewe ikosa mu rubuga rw’amahina, uyu mukinnyi akaba ari nawe wahise asaba kuyitera ariko birangira umunyezamu w’ikipe ya Ibanda FC ayikuyeho.
Umutoza Masudi Djuma Irambona wa Rayon Sports akaba yakoze izi mpinduka mu rwego rwo kugirango iyi kipe irusheho kumenyerana kugirango izatange umusaruro mwiza muri uyu mwaka w’imikino wa 2021-2022.
Ku ruhande rw’ikipe ya Ibanda FC yakinaga uyu mukino ubona ko nayo ikinira umupira wayo hagati kimwe na Gikundiro yari yakiriye uyu mukino, gusa ku mpande zombi bakaba ntaburyo baremye buhambaye bwo kubona igitego kugeza ubwo iminota 90 yarangiye ari ubusa ku busa.
Ikipe ya Rayon Sports ikinnye uyu mukinnyi mu gihe yitegura gukina na Bugesera FC ku wa gatandatu w’iki cyumweru aho bazakinira kuri Sitade ya Kigali guhera saa cyenda zuzuye, uyu mukino urimo kwitegurwa mu gihe umukinnyi Nsengiyumva Isaac aherutse gupimwa bamusangan COVID 19.
