Ku gicamunsi cyo kuri uyu wa gatatu, nibwo ikipe ya Rayon Sports yari yakiriye ikipe y’Ingabo z’Igihugu ya APR FC, ni umukino warangiye amakipe yombi anganyije ubusa ku busa mu mukino wabereye kuri Sitade ya Kigali.
Muri uyu mukino utari unogeye ijisho ugereranyije ni uko aya makipe asanzwe akina ntaburyo bwinshi bwabonetse bwo kuba bwari bubyare igitego, gusa mu gice cya mbere umukino ugitangira ikipe ya Rayon Sports yanyuzagamo igasatira nubwo ntacyo byatanze.
Mu gice cya mbere cy’umukino ikipe ya Rayon Sports yavunikishije rutahizamu wayo Leandre Willy Onana wavuye mu kibuga asimburwa na Kwizera Pierrot, Onana wari watangiye neza muri uyu mukino yavuyemo ubona ko ikipe ya Rayon Sports igize icyuho.
Igice cya kabiri cy’umukino cyihariwe n’ikipe ya APR FC ari nayo izakira umukino wo kwishyura mu cyumweru gitaha, gusa nayo nta buryo buhambaye yabonye muri uyu mukino kuko iminota 90 yose yarangiye amakipe anganyije 0-0.
Ni mugihe Rayon Sports yo izerekeza i Musanze gukina n’ikipe ya Musanze FC muri shampiyona, gusa aya makipe azongera guhura mu cyumweru gitaha mu mukino wo kwishyura w’igikombe cy’Amahoro.
Usibye uyu mukino, kuri uyu wa kane tariki ya 12 Gicurasi 2022, Ikipe ya AS Kigali iherereye i Muhanga mu mwiherero izakira ikipe ya Police FC, uyu mukino nawo uzabera kuri Sitade ya Kigali i Nyamirambo.
Tubibutse ko ikipe y’ingabo z’igihugu izasubira mu kibuga mu mpera z’iki cyumweru tariki 14 Gicurasi ikina umukino w’umunsi wa 27 wa shampiyona na Kiyovu Sports kuri sitade ya Kigali i Nyamirambo.
