Kuri iki cyumweru nibwo hakomezaga imikino y’umunsi wa 13 wa shampiyona y’ikiciro cya mbere mu Rwanda, kuri uyu munsi nibwo ibitego byarumbutse ugereranyije n’umunsi wa shampiyina waherukaga ndetse amakipe amwe namwe akaba yatunguwe.
Uyu munsi wa 13, ukaba waratangiye gukinwa kuri uyu wa gatandatu tariki ya 10 Ukuboza 2022 ubwo ikipe ya Police FC yatsinzwe na Kiyovu SC igitego kimwe ku busa cyatsinzwe na Elissa Ssekisambu naho Marines FC inganya na Gorilla FC 0-0.
Kuri iki cyumweru tariki ya 11 Ukuboza 2022, ikipe ya AS Kigaki yihanije ikipe ya Espoir FC yo mu karere ka Rusizi, iyitsinda ibitego 4-0.
Igice cya mbere cyarangiye ikipe y’abanyamujyi iyoboye ku gitego kimwe kubusa cyatsinzwe na Gilbert Dusingizimana ubwo hari ku munota 31 w’umukino.
Amakipe yombi avuye ku ruhuka nibwo ikipe ya AS Kigali yongeye kubonezamo igitego cya kabiri cyatsinzwe na Hussein Shaban Shabalala ku munota wa 52 yongeramo ikindi kuwa 70 nyuma haboneka ikindi cyatsinzwe na Nyarugabo Moise.
Gutsinda uyu mukino ku ruhande rwa AS Kigali byagumishije iyi kipe ku mwanya wa 2 ku rutonde rwa shampiyona n’amanota 27 naho Espoir FC yatsinzwe ikaba yagumye ku mwanya wa 15 n’amanota 7.
Muri uyu mukino kandi Rutahizamu w’umurundi Hussein Shaban Shabalala yagezaga ibitego 10 muri uyu mwaka w’imikino ubwo hamaze gukinwa imikino 13 ya shampiyona y’u Rwanda 2022/2023.
Usibye iyi mikino yakinwe mu mpera z’iki cyumweru, ikipe ya Rutsiro FC irakina na APR FC kuri uyu wa mbere kuri sitade Umuganda.
Uko imikino y’umunsi wa 13 wagenze muri rusange:
Kiyovu SC 1-0 Police FC
Marines FC 0-0 Gorilla FC
Etincelles FC 3-2 Rayon Sports
Mukura VS 0-1 Bugesera FC
Musanze FC 0-1 Gasogi United
AS Kigali 4-0 Espoir FC
Sunrise FC 5-2 Rwamagana FC
