Muri Amerika, imibare yagaragaje ko abaturage babona ko Barack Obama ariwe wabayoboye neza mu buzima bwabo bwose mu bategetse iki gihugu cy’igihangange ku Isi.
Imibare igaragaza 44% bemeza ko Obama ariwe Perezida wa Mbere cyangwa uwa Kabiri wayoboye neza. Ni mu gihe abahwanye na 31% bemeza badashidikanya ko ari we uza ku isonga mu buzima bwabo bwose.
Ni imibare yagaragajwe n’ubushakashatsi bwakozwe n’Ikigo Pew Research Centre kiri i Washington, cyazobereye mu gukora ibyegeranyo kuri politiki n’imibereho myiza y’abaturage.
Muri iki kigereranyo Bill Clinton ari ku mwanya wa kabiri n’icyizere cya 33%, Ronald Reagan 32%, Donald Trump akagira 19%.
Mu 2011 bwo Abanyamerika bari bashyize Obama ku mwanya wa kabiri ku rutonde rw’ababayoboye neza mu buzima bwabo bwose rwari ruyobowe na Bill Clinton. Icyo gihe yari muri manda ye ya mbere.
Mu mashyaka imibare igaragaza ko aba-démocrate benshi bemera ko Obama yababereye umuperezida mwiza kurusha Bill Clinton.
Ku ba-républicain ariko bo si ko bimeze, kuko ngo batazibagirwa Ronald Reagan baha amanota 57%, naho Donald Trump akamukurikira na 40%.
