Kuri uyu wa gatandatu tariki ya 16 Ukwakira 2021 nibwo ikipe ya Rayon Sports yaraye itangaje ko yongereye amasezerano umukinnyi wayo ukina hagati afasha ba rutahizamu Muhire Kevin ndetse inaha amasezerano y’imyaka ibiri rutahizamu w’umunya-Brazil Chrismar Malta Soares.
Binyuze ku rubuga rwa Twitter rwa Rayon Sports nibwo bemeje ko Kevin yongereye amasezerano muri Gikundiro, ni nyuma yaho uyu mukinnyi yari amaze iminsi bari mu biganiro ariko ntibigere ku musoza.
Muhire Kevin yongereye amasezerano yo kuguma muri iyi kipe ku ncuro ya gatatu agiye kuyikinira kuko ubwo yari avuye mu ikipe y’Isonga FC yahise aza muri Rayon Sports nyuma aza kwerekeza mu gihugu cya Misiri, yongeye kugaruka asinya amasezerano y’igihe gito ubwo biteguraga umwaka w’imikino wa 2021 wakinwe mu gihe kigufi.
Uyu mukinnyi ntabwo byamugendekeye neza muri iyi kipe kuko ubwo barimo bitegura gukina iyo mikino y’umwaka wa 2020-2021 yagize ikibazo cy’imvune yatumye adakinira Gikundiro, kuri ubu yongeye kuguma muri iyi kipe yitegura gukina umwaka w’imikino wa 2021-2022 uzatangira tariki ya 30 Ukwakira 2021.
Rutahizamu Chrismar Malta Soares aje muri Rayon Sports avuye mu gihugu cya Brazil mu kiciro cya kabiri, uyu mukinnyi kandi yanyuze mu makipe atandukanye y’iwabo arimo SE Patrocinense, FF Sports, Trindade na União Suzano yakiniye imyaka ibiri kuva mu mwaka w’imikino wa 2013/14.
Gikundiro ikomeje kwiyubaka nyuma yaho yazanye abandi bakinnyi batandukanye barimo umunyezamu Hategekimana Bonheur wavuye muri Espoir FC, Mitima Isaac, Rharb Youssef na Ayoub Ait Lahssaine bavuye muri Raja Casablanca, Byumvuhore Trésor, Essombe Willy Onana, Mugisha François , Souleyman Sanogo, Muvandimwe Jean Marie Vianney, Nsengiyumva Isaac, Mushimiyimana Mohamed na Mico Justin.
