Umushyushya rugamba Anita Pendo yagaragaje ko ababajwe na bamwe bakomeje kuvuga ko asanzwe afite umwana akaba yaramusize iwabo i Gahini muri Kayonza.
Uyu mushyushya rugamba akaba n’umunyamakuru yatangaje ibyo abinyujije ku rubuga rwe rwa Instagram avuga ko nta mwana asanzwe afite. Yemeza ko ahubwo atwite kandi ko ari hafi kwibaruka.
Agira ati “Reka mbisobanure neza…nakomeje kubona hari abandika ngo nasize umwana i Gahini, nta mwana mfite uba i Gahini! Mwe murimo kubyandika mubanze mutekereze ndetse muperereze kubyo muvuga.
Nkunda abana sinahisha umwana mufite kuko ni cyo kintu gishimishije mu buzima gitera n’ishema umubyeyi. Murindire uwo Imana izaduha ibindi mubireke. Umwana ari munzira!
Anita Pendo kuri ubu arakuriwe
Bamwe mu bafana be bamukurikira kuri Instagram bagaragaje ko ba muri inyuma bahamya ko n’iyo yaba afite umwana ntacyo byaba bitwaye.
Bivugwa ko Anita Pendo agiye kubyarana imfura ye n’umukunzi we bamaranye iminsi witwa Nizeyimana Alphonse Ndanda umwe mu banyezamu ba AS Kigali wayigiyemo avuye muri Mukura VS.
Yakunze gutangazwaho ko atwite ariko akanyomoza ibyabaga byatangajwe avuga ko atari ukuri.
