Ikipe y’ingabo z’igihugu y’u Rwanda APR FC yashoje imikino yayo ya gicuti itsinda ikipe ya Mukura Victory Sports ibitego bine ku busa harimo bibiri bya rutahizamu Danny Usengimana, kimwe cya Mugunga Yves ndetse na Nshuti Innocent.
Uyu mukino wasozaga iya gicuti ku mpande zombi hitegurwa isubukurwa rya shampiyona y’u Rwanda iteganyijwe gutangira tariki ya 1 Gicurasi 2021 ikazasozwa ku ya 29 Kamena 2021, wakiniwe ku kibuga cya Shyorongi aho ikipe ya APR FC isanzwe ibarizwa.
Muri uyu mukino ikipe ya APR FC niyo yatangiye neza kuko rutahizamu wayo Nshuti Innocent yayiboneye igitego cya mbere, gikurikirwa n’ibindi bibiri bya Danny Usengimana, umukino usozwa Mugunga Yves atsinda igitego cya kane.
Uyu mukino ukaba wari uwa gatatu wa gicuti ikipe ya APR FC itsinze ndetse yose uko yayikinnye ikaba yarayiteayemo neza, dore ko mu mukino wa mbere yatsinze ikipe ya Rutsiro igitego kimwe ku busa naho mu mukino wa kabiri itsinda ikipe ya Marines ibitego 2-0.
APR FC ikaba irimo kwitegura shampiyona izantangira mu mpera z’iki cyumweru aho izatangira yakira ikipe ya Gorilla FC bari kumwe mu itsinda rya mbere bakazakinira kuri sitade ya Huye yo mu ntara y’amajyepfo.
