Ubwo kuri uyu wa kane hakinwaga umukino ubanza wa kimwe cya kabiri w’umikino wa kimwe cya kabiri cy’igikombe cy’Amahoro, ikipe y’Abanyamujyi ya AS Kigali yaraye itsinze Police FC igitego kimwe ku busa cyatsinzwe na Shabalala.
Ni umukino wakinwe ku isaha ya Saa Cyenda ubera kuri Sitade ya Kigali i Nyamirambo, aho AS Kigali yagiye gukina uyu mukino ivuye mu karere ka Muhanga aho yari imaze iminsi 3 ikorera umwiherero wo kwitegura uyu mukino ubanza.
Igitego kimwe cyabonetse muri uyu mukino cyatsinzwe na Hussein Shaban Shabalala ubwo hari ku munota wa 44 w’umukino, iki gitego kimwe cyabonetse muri uyu mukino nicyo cyatandukanyije impande zombi.
Gutsinda uyu mukino kwa AS Kigali bitumye umutoza Casa Mbunga Andre yuzuza imikino itanu adatsindwa kuko niyo amaze no gutoza kuva ageze muri iyi kipe y’Abanyamujyi, muri iyo mikino yatsinze imikino 3 anganya indi 2.
Umukino wo kwishyura uteganyijwe mu cyumweru gitaha, ubwo tariki ya 18 Gicurasi 2022 kuri sitade ya Kigali i Nyamirambo Police FC izaba yakiriye ikipe ya AS Kigali.
