Amatora yakoreshejwe n’Ikigo cy’Abanyamerika gikora ubushakashatsi ‘Gallup’, yagaragaje ko uwahoze ari Perezida wa Leta zunze Ubumwe za Amerika, Barack Obama, ari we mugabo ukunzwe cyane muri iki gihugu naho uwari Umunyamabanga wa Leta ushinzwe Ububanyi n’Amahanga, Hillary Clinton, akaba umugore ukunzwe cyane.
Aya matora ngarukamwaka yatangajwe ejo kuwa Gatatu, yatumye Obama aba umugabo ukunzwe mu myaka 10 ikurikirana, mu gihe Clinton watsinzwe na Donald Trump, mu mwaka ushize ari ku nshuro ya 16 agirwa umugore ukunzwe kurusha abandi muri Leta zunze Ubumwe za Amerika.
Mu banyamerika batoye bose, abagera kuri 17% bavuze ko Obama ari umugabo ukunzwe cyane, mu gihe umwaka ushize abagera kuri 22% ari bo babyemeje. Trump yaje ku mwanya wa kabiri n’amajwi 14%, akurikirwa na Papa Francis wagize 3%.
Mu batoye bose kandi, 9% bemeje ko Hillary Clinton ari we mugore ukunzwe cyane, akurikirwa na Michelle Obama wagize 7% naho Oprah Winfrey agira 4%. Gallup yavuze ko hatoye abantu bakuru 1049, hagati ya tariki 4-11 Ukuboza.
