Leta y’u Burundi ifite umugambi wo gukusanya amafaranga yo gutegura amatora y’umukuru w’Igihugu ateganijwe muri 2020. Aya mafaranga akaba akatwa ku mishahara y’abakozi ba Leta batagishijwe inama naho abaturage bagahatirwa gutanga umusanzu.
Minisitiri w’umutekano mu gihugu Pascal Barandagiye akaba yatangarije itangazamakuru kuri uyu wa mbere ibijyanye n’amafaranga abantu bategetswe gutanga.
Yavuze ko leta igomba gukusanya imisanzu kuri buri rugo, aho rusabwa gutanga nibura amafaranga ibihumbi bibiri (2000) buri mwaka. Abanyeshuri bujuje imyaka yo gutora bo barasabwa gutanga amafaranga igihumbi (1000) buri mwaka. Abakozi ba leta bo bategetswe gutanga kimwe cya cumi ku mushahara wa buri kwezi.
Kuba leta yashyizeho ingano y’amafaranga abarundi mu byiciro bitandukanye bagomba gutanga, abaturage batagishijwe inama, bikaba bibonwa na benshi nkaho ari ugushaka amafaranga mu baturage ku mbaraga.
Ni mu gihe kandi abarundi benshi badashyigikiye umugambi wa Perezida Nkurunziza afite wo kwiyamamariza manda yindi mu matora ya 2020. Mu ntangiriro z’ukwezi kwa cumi, akaba yaratangije umushinga wo kuvugurura itegeko nshinga kuko ritamwereraga kwiyamamariza indi manda ya gatatu.
