Burundi : Gerenade yatewe mu kabari k’urwagwa ikomeretsa abantu 11

Abantu 11 bakomerekejwe na gerenade yatewe mu kabari mu ijoro ryo ku wa Gatandatu rishyira iryo ku cyumweru tariki ya 11 Gashyantare 2018.

Nk’uko bitangazwa na Polisi mu Burundi, ngo gerenade yatewe mu kabari kitwa Mutobe gacururizwamo urwagwa mu gace ka Musaga (Ceceni), Komine Muha, mu mujyi wa Bujumbura.

Ku cyumweru nibwo Polisi yatangaje ko ushinjwa gutera iyo gerenade, yafashwe, bakaba bagikora iperereza ngo hamenyekanye icyaba cyihishe inyuma y’icyo gitero.

Ibikorwa by’ubwicanyi bikomeje kuvugwa hirya no hino mu Burundi, imiryango iharanira uburenganzira bwa muntu mu Burundi ikaba itangaza ko abantu basaga 570 bishwe kuva mu mwaka ushize wa 2017.