Myugariro wahoze akinira ikipe ya AS Kigali ndetse akaba akinira Amavubi, Emery Bayisenge yamaze kwerekeza mu gihugu cya Bangladesh mu ikipe ya Saif Sporting Club yo mu kiciro cya mbere aha yasinye amasezerano y’imyaka ibiri iri imbere.
Emery Bayisenge asubiye muri iyi kipe yakiniye mu gihe cy’umwaka umwe wa 2019 nubwo icyo gihe yari yasinye amasezerano y’imyaka ibiri atasoje kubera ikibazo cy’imvune yagize.
Ubwo hari mu mpera za 2019 uyu mukinnyi yaravunitse biba ngombwa ko agaruka mu Rwanda kuhivuriza, yakize muri Werurwe 2020 ariko ntiyasubira muri Saif Sporting Club kubera ko icyorezo cya Koronavirusi cyari cyageze mu gihugu, icyo gihe yavuganye n’ikipe ye imwemerera ko yashaka ikipe mu Rwanda akazasubirayo icyorezo gicogoye.
Icyo gihe uyu myugariro yahise asinyira ikipe ya AS Kigali asinya amasezerano y’umwaka umwe warangiranye na shampiyona y’umwaka w’imikino wa 2019-2020, nyuma nibwo yahise yongera kuvugana n’ikipe ya Saif Sporting bahita bumvikana ko akomezanya nayo mu gihe cy’imyaka ibiri iri imbere.
Uyu mukinnyi ukina nyugarira agiye gukina muri iyi kipe nyuma yaho yanyuze mu yandi atandukanye ya hano mu Rwanda arimo APR FC , Isonga ndetse na AS Kigali.
