Ubuyobozi bw’ikigo Facebook, Inc. ari nacyo kigenzura imbuga nkoranyambaga za Instagram na WhatsApp, bugiye guhindura amazina yazo, aho biteganywa ko kizongera izina ryacyo ku mazina asanzwe y’izi mbuga zikoreshwa n’abantu benshi cyane ku Isi.
Ni ukuvuga ko mu minsi iri imbere izi mbuga zishobora guhabwa amazina mashya, hakabaho “Instagram from Facebook” na “WhatsApp from Facebook.”
Facebook yaguze Instagram mu 2012 igura na WhatsApp mu 2014, icyo gihe ubuyobozi bwatangazaga ko izi mbuga zizakomeza gukora nk’izigenga.
Gusa ikinyamakuru The Information cyatangaje ko Facebook yamaze kumenyesha abakozi bayo ibijyanye n’izi mpinduka, aho umuvugizi wa Facebook yavuze ko bashaka “kugaragaza neza ibicuruzwa na serivisi bibarizwa muri Facebook.”
Abashinze Instagram na WhatsApp baherutse gutandukana na Facebook nyuma y’uko Kevin Systrom na Mike Krieger bananiwe kumvikana na Mark Zuckerberg uyobora Facebook, ku ngingo zimwe na zimwe z’icyerekezo afitiye izi mbuga.
Bibarwa ko Instagram ikoreshwa n’abasaga miliyari imwe ku Isi, kimwe na WhatsApp.
Src : IGIHE
