Kuri uyu wa Kane tariki 26 Gicurasi 2022, mu nyubako ya BK Arena, Ishyirahamwe Nyarwanda ry’umukino wa Basketball ‘FERWABA’, ryasinyanye amasezerano y’imikoranire na NBA Africa, mu gihe cy’imyaka ibiri ishobora kongerwa.
Ni amasezerano yashyizweho umukono na Perezida wa FERWABA, Bwana, Mugwiza Desiré na Victor Williams; Umuyobozi wa NBA Africa,Ni umuhango kandi witabiriwe kandi n’Umunyabanga Uhoraho muri Minisiteri ya Siporo, Bwana, Shema Maboko Didier.
Nkuko byatangarijwe mu kiganiro cyari kitabiriwe n’itangazamakuru ryaba irikorera hano imbere mu gihugu ndetse na mpuzamahanga, ni amasezerano yitezweho kuzafasha mu guhyiraho irushanwa rya ‘NBA Junior League’, mu gihugu, kwigisha no guhugura abatoza b’umukino w’intoki wa Basketball mu bana ndetse n’abasifuzi.
Mu guteza imbere amarushanwa y’abakiri bato bakina uyu mukino wa Basketball, biteganyijwe ko aya marushanwa azitabirwa n’ibigo 30 by’abahungu n’ibigo 30 by’abakobwa, aya marushanwa kandi biteganyijweko azatangira uyu mwaka.
Ku ikubitiro, mu bufatanye bwa FERWABA na NBA Africa biteganyijwe ko kuri uyu wa Gatanu guhera ku isaha ya Saa Tatu n’igice z’ijoro hakinwa umukino uri buhuze abakinnyi b’ikipe y’igihugu y’u Rwanda bari munsi y’imyaka 23 ndetse n’abakinnyi banyuze mu irerero rya NBA Africa.
Uyu mukino urakinwa nyuma y’uwo guhatanira umwanya wa Gatatu mu irushanwa rya Bsketball Africa League (BAL), uyu mukino biteganyijwe ko uri buhuze ikipe ya Zamalek yo mu Misiri ndetse na FAP yo muri Cameroon, ni umukino ukinwa guhera ku isaha ya Saa Kumi n’ebyiri zo kuri uyu wa gatanu.
