Gen. Muhoozi Kainerugaba , Umuhungu wa Perezida Museveni, yatangaje ko ababajwe n’urupfu rw’umuhanzi Radio wari umwe muri babiri bari bagize itsinda (Goodlyfe) ryari rikomeye kandi rinakunzwe muri Uganda.
Abicishije ku rukuta rwe rwa Twitter, Gen Muhoozi yagize ati “Birababaje cyane kumva inkuru y’urupfu rw’umuhanzi ukomeye w’umunyempano, Mowzey Radio, tuzahora tukwibuka , Ruhukira mu mahoro Radio”
Radio yapfuye mu gitondo cyo kuri uyu wa Kane tariki ya 1 Gashyantare 2018, nyuma yaho akubitiwe mu kabari akanahagirira impanuka akagwa, agahita akubita umutwe ku makaro bikamuviramo kuviramo imbere. Yapfuye yari amaze iminsi igera ku icyenda arembeye mu bitaro.
Radio na mugenzi we Weasel baririmbanaga mu itsinda Goodlyfe.Ni bamwe mu bahanzi bagaragaye mu bikorwa byo kwamamaza umukandida Museveni w’ishyaka NRM riri ku butegetsi muri Uganda, kuva yajyanwa mu bitaro, umuryango wa Museveni wakomeje kugaragaza ko uhangayikishijwe n’uburwayi bwe.
