Nyuma y’ ifatwa ry’umutekamutwe Rusesabagina wiyise umunyapolitiki karundura, maze abazungu bakamurundumurira ibifaranga, abo basangiraga ibyo bisabano barabunza imitima kuko batakaje uwo basabishaga abatazi iyo biva n’iyo bijya. Umuhungu we Trésor Rusesabagina arabogoza ku mbuga nkoranyambaga,ngo aratabariza intangarugero mu guharanira amahoro!
Ababonye amafoto ye mwabonye uburyo yisasira akiyorosa inoti z’amadolari, si ukwishimisha mu maguru y’abazungukazi, yarangiza ati mbabajwe na data burya ibisabano biryohera imburuburu, ariko ntibibura gushira.
Ibyo bifaranga widagaduramo si ibisabano gusa, ahubwo ni n’ibisahurano, so Rusesabagina Rusisibiranya yambuye impunzi zari muri Hotel des 1000 Collines mu gihe cya Jenoside yakorewe Abatutsi.
Amarira yawe rero ashingiye ku kubura uwagusahuriye akanagusabira, Iyumanganye nyabusa iminsi y’umujura yageze!
Iso utazi gutandukanya hoteli n’ inkambi y’impunzi umwita umubyeyi uzakuraho umurage mwiza wa mwana we?Ngo uzakora byose kugirango ubohoze so?Uri uwuhe se da?Nawe uzamubaze, ibyo yageragereje muri Nyungwe nibyo bimutaye kuwakajwiga.Ariko se urabuzwa n’iki kwitetesha ko abamufashe batamugereye mu ko FLN yanyu yagereye mu k’abaturage ba Nyabimata na Nyamagabe!
Reka rero nkubwire Rusesabagina muto, dore uracyakura,uramenye ntuzabe nka Rusesabagina gito.
Urugero rwa so rukweretse ko ubuhemu budahera, ahubwo burangira nabi. Uzirinde kugwingira mu mutwe no kugwira inda nka so, ugendere kure umugambi wo kumena amaraso ya bene Kanyarwanda, kuko burya arasama. Wikwemera gutungwa n’ibisahurano n’ibisabano?
Abo mungana ubu barakorera Igihugu,none wowe urashaka kuzakigwa igicuri inama ni imwe, Itandukanye na politiki mburamajyo y’amabuguma abiri, so na Twagiramungu, humura kandi ntawe uzakugayira kwanga umubyeyi gito.Nako numvise na nyoko Tasiyana yaradutse mu bitutsi!Wagorwa wagorwa wa mwana we!!
