Imikino ya Afrobasket irakomeza hakinwa iyo gushaka itike yo kujya muri 1/4, kuri uyu wa mbere u Rwanda rurakina na Guinea

Irushanwa Nyafurika ry’ibihugu mu bagabo mu mukino w’intoki wa Basketball rizwi nka Afrobasket rirakomeje mu mujyi wa Kigali by’umwihariko mu nyubako ya Kigali Arena, nyuma yaho impera z’icyumweru zirangiye imikino mu matsinda irangiye, kuri uyu wa mbere haratangira gukinwa imikino yo gushaka itike ya 1/4.

Mu matsinda uko byari biteganyijwe ni uko ikipe ya mbere muri buri tsinda yahise ibona itike ya 1/4 naho ikipe ya kabiri ndetse n’iya gatatu zihita zibona itike yo guhatanira kujya muri icyo kiciro, ni mugihe ikipe ya nyuma ariyo ya kane yahise isezererwa.

Amakipe yabonye itike ari aya mbere mu matsinda ni Cote d’Ivoire, Senegal, Cape Verde ndetse na Tunisia, amakipe abanza gushaka itike ni Rwanda, Guine, Angola, Misiri, Uganda, Kenya, Nigeria ndetse na South Sudan.

Uko imikino yo gushaka itike iteye ni uko kuri uyu wa mbere, ikipe y’igihugu ya Misiri irakina n’ikipe y’igihugu ya Angola ni umukino uri bube ku isaha ya Saa cyenda zuzuye muri Kigali Arena, nyuma umukino utegerejwe ni uwo u Rwanda ruri bwakire ikipe y’igihugu ya Guine ku isaha ya saa kumi nebyiri z’umugoroba.

Indi mikino itegerejwe muri iki kiciro cyo gushaka itike yo kujya muri 1/4 cya Afrobasket ni uko Uganda igomba gukina na Nigeria naho Kenya izakine na South Sudan.