Inkuru iri kuvugwa cyane muri Kigali ni iy’umukobwa w’umunyamakurukazi wahisemo kwibanira n’undi mugenzi we bahuje igitsina.
Umukobwa witwa Mucyo Becky wahoze ari umunyamakuru kuri Radio na Tv 10 yasabwe na mugenzi we bahuje igitsina ko bashyingiranwa ndetse arabimwemerera, igikorwa kitamenyerewe hagati y’abantu babiri bahuje igitsina mu Rwanda.
Mu Rwanda byavuzwe kenshi ko ubutinganyi bwadutse ndetse bamwe bakabifata nk’ibihuha gusa muri iyi minsi ibintu byafashe indi ntera, mu ijoro ryo kuri uyu wa Gatandatu tariki 11 Werurwe 2017 kuri Hotel imwe iherereye Kibagabaga, Becky Mucyo n’umukobwa uzwi nka Ferrand bivugwa ko ari umurundi bemeranyije kurushinga maze amafoto y’uwo munsi w’amateka hagati yabo ashyirwa hanze.
Abakobwa babiri baritegura gushyingiranwa.
Ferrand na Becky bemeranyije kubana
Becky ni uwo wambaye ikanzu itukura ufite icyapa cyanditseho YES, Ferrand ni uwambaye inkweto z’umweru,ipantalo itukura n’ishati y’umweru ufite icyapa cyanditseho ME.
Amakuru avuga ko Becky iby’umubano we na mugenzi we yabitangarije itangazamakuru ntacyo yishisha ku murongo we wa telefoni avuga ko yishimiye intambwe bateye mu buzima bwabo. Uyu mukobwa ndetse yikomye bikomeye abirirwa babatuka, avuga ko ikibazo ari ibyo baba badasobanukiwe yongeraho ko kuba babana ari uburenganzira bwabo.
Yakomeje ashimira Leta y’u Rwanda kuba nta muntu ibangamira mu mahitamo ye. Abajijwe igihe bazakorera ubukwe Becky yavuze ko nibiba azatumira abantu ariko ko atahita atangaza igihe nyacyo. Becky avuga ko we na Ferrand bagiye kuzuza umwaka bakundana.
Nk’uko zimwe mu nshuti za hafi z’aba bombi zibitangaza ziravuga ko batangiye gupanga ubukwe ku buryo mu minsi ya vuba barambikana impeta mu ruhame ndetse bagakora n’ubukwe.
Dore andi mafoto aherekejwe n’amagambo agaragaza ubunshuti aba bakobwa bombi bitegura kurushinga bafitanye.
Aya mafoto agaragaraho amagambo bagiye bandikirana ku mbuga nkoranyambaga babwirana ko bakundana by’agahebuzo.
Ese ibi umuco nyarwanda urabyemera, Ese Minisiteri ifite umuco munshingano zayo yo ibibona ite ? mudusobanurire ? e-mail yacu ni rushyashya@gmail.com
Umwanditsi wacu
