Nyuma y’ubwicanyi bwakorewe ubwoko bw’Abafulani 160 bo muri Mali, Minisitiri Soumeylou Boubeye Maiga na Guverinoma ye yose beguye.
Iyi guverinoma irashinjwa ko itashoboye gushakira umuti iki kibazo cy’ubwicanyi, harimo no gushaka ababukoze ngo bajyanwe mu butabera. Byatumye ku wa gatatu inteko ishingamategeko ihaguruka, itegura amatora y’ikizere. Amatora y’ikizere guverinoma ifitiwe atorwa n’inteko ishingamategeko gusa.
Ibi byatumye Maiga yandikira Umukuru w’Igihugu, Ibrahim Boubacar Keita, amusaba kwegura hamwe n’abaminisitiri be. Perezida Keita yatangaje ko yemeye ubwegure, yongeraho ko vuba araba ashyizeho undi Minisitiri w’Intebe.
“Muraza kumenya Minisitiri w’Intebe na guverinoma nshya vuba nyuma y’ubwumvikane n’abagize politiki.” Boubakar Keita.
Ubusanzwe, kuva mu 2012 Mali yugarijwe n’imitwe y’iterabwoba ishamikiye kuri Al Qaeda. Ibi byashyize igitutu kuri guverinoma kuko zashinjwaga ko zananiwe kurwanya iyi mitwe cyangwa se zigashaka uburyo iki kibazo cyakemurwa mu buryo bwo kugirana amasezerano y’amahoro ahamye.
BBC ivuga ko mu 2015 habaye amasezerano n’imitwe ya Kiislamu ariko nta cyo yatanze, kuko kugeza ubu iracyafata uduce tunini tw’igihugu cyane nk’udutuwe n’abaturage benshi.
Uru rupfu rw’abantu 160 bo mu bwoko bw’aba-Fulani rwongeye isura y’ubushobozi buke bwa guverinoma ya Mali ku buryo yo ubwayo yifatiye umwanzuro wo kwegura. Nyuma y’ubu bwicanyi bwabaye ku wa 23 Werurwe, 2019, ibihumbi by’abaturage bigabije imihanda ya Bamako basaba ko hagira igikorwa.
