Nyuma yaho ikipe ya Mukura Victory Sport ibarizwa mu karere ka Huye mu ntara y’amajyepfo itandukanye n’uwari umutoza wayo Djilali Bahloul yeguye kuri iyo mirimo mbere y’uko shampiyona ihagarikwa, ubuyobozi bwayo bwatangaje ko hari batoza bifuza guha iyo mirimo.
Nyuma yo gusezera kuri iyo mirimo kuri Djilali , ikipe ya MVS yatangaje ko Nshimiyimana Canisius ariwe ugomba kuba afite iyo kipe by’agateganyo nubwo nta mukino n’umwe yigeze atoza.
Kugeza ubu hari amakuru yavugaga ko MVS izatozwa n’umutoza ukomoka muri Argentine ndetse akazungirizwa na Mateso Jean De Dieu watoje ikipe ya AS Kigali nyuma aza gusezererwa mu ntangiriro z’uyu mwaka w’imikino wa 2020-2021.
Mu kiganiro twagiranye n’umuyobozi w’ikipe ya Mukura VS Gasana Jerome yahakanye amakuru avuga ko umutoza ukomoka muri Argentine ariwe uzatoza Mukura VS.
Gasana Jerome yagize ati “Ayo makuru y’umutoza mukuru siyo rwose, nanjye nabyumvise mukanya ntabyo rwose”.
Ku rundi ruhande ariko Gasana yemeje ko Mateso we ari ku rutonde rw’abatoza bavuganye na Mukura VS, yagize ati “nawe ari mubo turi kuganira ariko ntabwo wavuga ko ariwe kuko ntabwo turagera ku cyiciro cya nyuma”.
Umutoza Mateso Jean De Dieu wamenyekanye cyane mu kazi ko gutoza ubwo yegukanaga igikombe cy’Amahoro mu Rwanda ari kumwe na AS Kigali ubwo hari mu mwaka w’imikino wa 2018-2019 , ku mukino wa nyuma yatsinze Kiyovu SC ibitego 2-1.
