Perezida w’u Burundi, Evariste Ndayishimiye, yasabye Imana kubana n’u Burundi, nyuma y’uko iki gihugu gihuye n’inkongi y’umuriro yibasiye ububiko bw’intwaro, zirakongoka.
Perezida w’u Burundi, Evariste Ndayishimiye, yasabye Imana kubana n’u Burundi, nyuma y’uko iki gihugu gihuye n’inkongi y’umuriro yibasiye ububiko bw’intwaro, zirakongoka.
Ndayishimiye ati “Ndahojeje abagize ivyago biturutse ku muriro wadutse mu bubiko bumwe bw’ikambi y’igisirikare iri muri zone Musaga. Turahumurije Abarundi bose : inzego z’igihugu ziri ku kivi kugira zitabare kandi zibandanye zikinga kugira ibintu bisubire mu buryo. Imana irinde Uburundi.”
Iyi nkongi yabaye mu ijoro ryo ku wa 31 Werurwe, yibasiye ububiko bw’intwaro buri mu kigo cya gisirikare kizwi nka ‘Base’, giherereye mu gace ka Musaga i Bujumbura.
Igisirikare cy’u Burundi na Minisiteri y’Umutekano w’imbere mu gihugu, byatangaje ko yaturutse ku kibazo cy’umuriro w’amashanyarazi.
Mu butumwa Perezida Ndayishimiye yashyize ku rubuga nkoranyambaga rwa X, mu ijoro ryo ku wa 31, yihanganishije Abarundi, ndetse asaba Imana kubana n’u Burundi.
Ati “Nihanganishije abagize ibyago biturutse ku muriro wadutse mu bubiko bumwe bw’ikigo cya gisirikare iri muri Zone Musaga. Duhumurije Abarundi bose: Inzego z’igihugu ziri gukora ibishoboka byose kugira ngo zitabare kandi zikomeje kurinda ubusugire mu buryo. Imana irinde u Burundi.”
Iyi nkongi y’umuriro yateye guturika gukomeye kw’intwaro za muri ubu bubiko ndetse ryumvikana mu bice bitandukanye bya Bujumbura.
BBC yavuze ko byageze Saa 22:30 hari ahacyumvikana urusaku rw’ibiturika.
Uku guturika kwateye impagarara n’ubwoba muri Bujumbura, ndetse abantu bamwe bagaragara basa n’abahunga.
Bamwe mu baturage begereye ikigo cya gisirikare cya ‘base’ bavuze ko inzu zabo zangiritse, ndetse bamwe bava mu ngo zabo bahungira mu tundi duce tw’uyu mujyi.
Bimwe mu bice by’ibisasu byaturitse, byaguye ku nzu zo muri cartier za Kinanira 3 na 4. Hari kandi ibyageze muri zone Ngagara, cartier 9, mu bilometero birenga bitanu uvuye aho impanuka yabereye.
Kugeza ubu ntihiramenyakana ingano y’ibyangijwe n’iyi nkongi y’umuriro, ndetse ntibizwi niba hari n’abayiguyemo.
