Kuri uyu wa gatanu tariki ya 26 Werurwe 2021, ikipe ya Mukura VS ibarizwa mu ntara y’amajyepfo y’u Rwanda yasinyishije abatoza bashya bayobowe na Zapata Rodolfo Antonio ukomoka mu gihugu cya Argentine ndetse akazaba yungurijwe na Mateso Jean De Dieu wahoze atoza ikipe ya AS Kigali akanayifasha gutwara igikombe cy’Amahoro cya 2019-2020.
Iyi kipe kandi ikaba yahaye abo batoza amasezerano y’imyaka ibiri ndetse hakiyongeraho n’umutoza w’abanyezamu witwa Theogene Ndaruhutse bakunze kwita Jabil.
Uyu mutoza Zapata Rodolfo Antonio w’imyaka 54 y’amavuko agiye gutoza ikipe ya Mukura VS aho afite inshingano zo kwegukana ibikombebikinirwa mu Rwanda.
Ni umutoza wabaye umukinnyi mu bihe byo hambere aho yakinaga nk’umunyezamu akaza kuva mu kibuga hakiri kare bitewe n’imvune yagize, Rodolfo kandi aje gutoza mu Rwanda nyuma yo gutoza amakipe arimo Sunshine Stars yo muri Nigeria, Gaborone United na Township Rollers zo muri Botswana ndetse na AFC Leopard yo mu gihugu cya Kenya.
