Polisi y’u Rwanda yagize Innocent Seninga Umutoza mushya w’Ikipe yayo y’umupira w’amaguru (Police FC).
Umuvugizi wa Police FC, Chief Inspector of Police (CIP) Jean de Dieu Mayira yemeje ko kuri uyu wa kane tariki 14 Nyakanga Seninga yasinye amasezerano yo gutoza iyi kipe mu mikino ya Shampiyona itaha.
CIP Mayira yagize ati,”Turahamya ko kuri uyu wa kane Innocent Seninga yasinye amasezerano y’umwaka umwe nk’Umutoza mukuru wa Police Football Club, ayo masezerano ashobora kongerwa atangira kubahirizwa kuva asinywe (2016) akaba azageza mu 2017.”
Seminega afite ubunararibonye mu gutoza umupira w’amaguru.
Yatoje Isonga FC, Sports Club Kiyovu, ndetse asinye aya masezerano yari Umutoza mukuru wa Etincelles FC, akaba yaratumye itamanuka mu cyiciro cya kabiri ahubwo ayifasha kuzamuka imyanya itanu muri Shampiyona, ikaba iri ku mwanya wa cumi n’amanota 32.
Seminega yashimye ubuyobozi bwa Polisi y’u Rwanda ku cyizere bwabugiriye bumushinga gutoza Police FC.
Innocent Seninga Umutoza mushya w’Ikipe y’umupira w’amaguru (Police FC).
Yakomeje agira ati,” Police FC ifite ubuyobozi buyitaho, kandi ni ikipe ifite intego yo guteza imbere umupira w’amaguru mu Rwanda. Njye n’abandi dufatanyije twijejwe n’ubuyobozi bwa Polisi y’u Rwanda ko buzatuba hafi kugira ngo inshingano dufite tuzigereho , kandi natwe twijeje abafana ba Police FC ndetse n’abakunzi b’umupira w’amaguru mu Rwanda muri rusange ko tutazabatetereza.”
RNP
