Amashyaka akomeye atavuga rumwe n’ubutegetsi muri Repubulika iharanira Demokarasi ya Congo yatangaje ko yiteguye gutanga umukandida umwe uzayahagararira mu matora y’umukuru w’igihugu ateganyijwe kuwa 23 Ukuboza.
Abayobozi b’aya mashyaka babitangarije mu myigaragambyo yabereye mu mihanda itandukanye y’umurwa mukuru, Kinshasa, kuri uyu wa Gatandatu, itariki 29 Nzeri 2018.
Félix Tshisekedi na Vital Kamerhe bari mu batavuga rumwe n’ubutegetsi ni bamwe mu bakandida bemerewe kuzahatanira umwanya w’umukuru w’igihugu kuko bujuje ibisabwa. Mu byo bagejeje ku bayoboke babo bongeye gushimangira ko batizeye imashini zizakoreshwa muri aya matora bavuga ko bazakomeza gusaba ko zihindurwa kandi itariki y’amatora idahindutse.
Naho Jean-Pierre Bemba na Moise Katumbi, batemerewe kuziyamamaza, bifashishije ikoranabuhanga bagize icyo babwira abari bitabiriye iyi myigaragambyo, bavuga ko bashyigikiye igitekerezo cyo kuzahagararirwa n’umukandida umwe.
Bwana Felix Tshisekedi, umuyobozi w’ishyaka UPDS uri mu bateguye iyi myigaragambyo nk’uko iyi nkuru dukesha VOA ikomeza ivuga, yabwiye itangazamakuru ko ubwinshi bw’abitabiriye iyi myigaragambyo ari ikimenyetso cy’uko bashyigikiwe.
Abapolisi babarirwa muri magana ni bo bari bacunze umutekano ahaberaga iyi myigaragambyo no ku nteko ishinga amategeko.
