Uwahoze akuriye ishami rya polisi rishinzwe iperereza ku byaha, Col Atwooki Ndahura yahakanye ko yemeye icyaha ubwo aheruka kugezwa mu rukiko rwa gisirikare nk’uko byatangajwe n’uwari uhagarariye leta mu rukiko mu ntangiriro z’iki cyumweru.
Umunyamategeko wa Col Ndahura, Evans Ochieng, yabwiye ikinyamakuru Daily Monitor ko umukiriya we yababajwe n’ibyatangajwe n’uyu munyamategeko wa leta mu Rukiko Rukuru aho yavuze ko yameye ibyaha ashinjwa mu rukiko rwa gisirikare.
Bwana Ochieng yavuze ko Col Ndahura yamubwiye ko ibyo uyu munyamategeko wa leta yavuze ari ibinyoma kandi azabyigarama mu rukiko.
Kuwa Mbere, uhagarariye intumwa nkuru ya leta, Genevieve Kampiire, yabwiye umucamanza Musa Ssekaana, ko Col Ndahura yageze ku rukiko rwa gisirikare mu cyumweru gishize akamera ibyaha byo kwitambika iyubahirizwa ry’amategeko ndetse akaba ategereje igihano azakatirwa kuwa 13 Nyakanga.
“Uwanditse wese iyo raporo itarabayeho yabikoze agamije inabi,” uyu ni umunyamategeko Ochieng wunganira Col Ndahura.
Mbere yahoo gato, umugore wa Col Ndahura yari yasabye Urukiko Rukuru gutegeka igisirikare gushyikiriza urukiko umugabo we nyuma yo kumara ibyumweru bibiri afungiye mu kigo cya gisirikare. Ubwo humvwaga ubusabe bwe, umucamanza yategetse UPDF gushyikiriza Col Ndahura urukiko mu minsi itarenze 5.
Ubushinjacyaha bwa gisirikare muri dosiye yabwo buvuga ko hagati ya Gashyantare na Werurwe muri uyu mwaka, ubwo yari agikorera mu ishami rishinzwe iperereza ku byaha ahitwa Bugolobi, Kamapala, ngo Col Ndahura yahimbye ibimenyetso byari bikubiye mu nyandiko yari irimo urutonde rw’impunzi z’Abanyarwanda bisobanura ishimutwa ryabo no gusubizwa mu Rwanda kandi hari dosiye bifitanye isano yari ikiri mu rukiko rukuru rwa gisirikare Uganda iregamo ASCP Joel Aguma, ASP Nickson Agasirwe n’abandi bantu 7 bakurikiranweho gushimuta no gucyura ku ngufu impunzi z’Abanyarwanda.
